Четири дена по Трамп, Си ќе го пречека Путин во Пекинг
Кинескиот претседател Си Џинпинг ќе го угости рускиот претседател Владимир Путин во Пекинг само четири дена по посетата на американскиот претседател Доналд Трамп на кинескиот главен град, објавува „Гардијан“.
Препорачано
Путин ќе пристигне во Кина во вторник вечерта, а средбата со Си е закажана за среда наутро, потврди помошникот на Кремљ, Јуриј Ушаков, за новинарите.
Двајцата лидери треба да разговараат за сите аспекти на билатералните односи, вклучувајќи го и долгонајавуваниот гасовод „Моќта на Сибир 2“, проект што дополнително ќе ја продлабочи енергетската врска меѓу Москва и Пекинг.
Во пресрет на средбата, Си и Путин разменија честитки, според кинеските државни медиуми. Си во писмото наведува дека соработката меѓу Русија и Кина „континуирано се продлабочува и зајакнува“, потсетувајќи дека оваа година се одбележува 30-годишнината од стратешкото партнерство меѓу двете земји.
Кинескиот државен таблоид „Глобал тајмс“ оцени дека Пекинг „брзо се етаблира како центар на глобалната дипломатија“, истакнувајќи дека е исклучително ретко една земја да биде домаќин на американскиот и рускиот претседател во рок од една недела еден од друг.
Блиските односи меѓу Пекинг и Москва го загрижуваат Западот со години, особено по руската инвазија на Украина во 2022 година. Западните дипломати и аналитичари веруваат дека економската и дипломатската поддршка на Кина ѝ помогнала на Русија да ја одржи својата воена машинерија, додека трговските односи меѓу двете земји достигнале рекордни нивоа од почетокот на војната.
Денес, Кина купува повеќе од една четвртина од целиот руски извоз, а енергетските производи играат особено важна улога. Големите купувања на руска нафта од страна на Кина ѝ донесоа на Москва стотици милијарди долари приходи потребни за финансирање на војната во Украина. Според Центарот за истражување на енергијата и чистиот воздух, Пекинг купил повеќе од 367 милијарди долари руски фосилни горива од почетокот на војната.
Во исто време, руската енергија стана уште поважна за Кина поради нестабилноста на Блискиот Исток и прекините во транспортот на нафта преку Ормутскиот теснец, клучниот светски поморски пат за енергија.
Иако односите меѓу Кина и Русија беа една од главните теми на западната дипломатија во последните години, војната во Украина не беше во фокусот на разговорите минатата недела меѓу Трамп и Си во Пекинг.
Главните теми на разговорите меѓу САД и Кина беа трговијата, Тајван и ситуацијата на Блискиот Исток. Трамп по средбата изјави дека Кина се согласува со него за важноста на повторното отворање на Ормускиот Теснец.
