Тренерот на Динамо Загреб, Анте Чачиќ го изрази незадоволството поради ремито на неговиот клуб на „Максимир“ против Шкупи во првиот натпревар од второто квалификациско коло во Лигата на шампионите (2:2).

Стратегот на „модрите“ и покрај неочекуваното реми, вели дека сè е отворено во овој двомеч и дека следува реваншот во Скопје за седум дена.

– Реков во најавата дека секој меч е посебен за себе, дека нема да биде лесно. Противникот се покажа како цврст во дуелот, а ние премногу лесно примивме два гола. Дојдовме до резултат, доминиравме во второто полувреме, практично Шкупи не ни дојде на 16 метри. Но, тешко е да се очекува добар резултат кога нема да направите ништо во шеснаесетникот. Се игра уште еден натпревар, сè е отворено. Предноста е што не се бројат головите на гости. Имаме осум дена пред нас, ќе се подготвиме. Имавме премногу грешки – рече Чачиќ за „ХТВ“.

Потсетување дека возвратната пресметка помеѓу Шкупи и Динамо Загреб ќе се игра на 26 јули на Националната арена „Тодор Проески“ – Скопје, а главен судија ќе биде Јакоб Кехлет од Данска.

Македонскиот репрезентативец Аријан Адеми имаше добро издание, со гол и асистенција, но не е среќен од крајниот резултат. За капитенот на Динамо, ова беше 93 настап и 12 погодок во Европа за клубот.

– Немаше потценување. Добро почнавме во натпреварот, ги притиснавме во нивната половина. После оној мој нереализиран зицер, паднавме во некоја криза и го примивме тој несмасен гол. Се вративме на крајот, а потоа уште една грешка. Тоа е фудбалот. Следниот натпревар е за три дена, одиме на победа во Копривница, а потоа во Скопје. Задоволен сум поради што собраб толку настапи за Динамо, но овој ден не е баш среќен за мене – беа зборовите на Адеми за „ХТВ“.