Извозот на швајцарски часовници во САД се намали за 55,6 проценти во септември, по увозните тарифи на Вашингтон, објави Федерацијата на швајцарската индустрија за часовници. Падот го компензира закрепнувањето на извозот на други клучни пазари како што се Кина и Хонг Конг, според агенцијата Франс-Прес. Во август, извозот во САД веќе се намали за 23,9 проценти по воведувањето на тарифи од 39 проценти. Според федерацијата, швајцарските производители направоле големи залихи на американскиот пазар пред да стапат во сила новите тарифи – па оттука, извозот во САД скокна за 149,2 проценти во април и за 45 проценти во јули.

„Повеќето пазари пријавија значителен раст во септември, но падот во САД го избриша сето ова“, се вели во соопштението на организацијата.

Извозот на часовници во Кина и Хонг Конг се зголеми за 17,8 проценти и 20,6 проценти, соодветно, во Сингапур за 8,3 проценти и во Јужна Кореја за 21,5 проценти. Јапонија забележа намалување од 7,9 проценти. Во Европа, извозот во Велика Британија се зголеми за 15,2 проценти, но се намали во Франција (-3,5 проценти), Италија (-3,9 проценти) и Германија (-14,6 проценти). Вкупниот извоз на швајцарски часовници на сите пазари се намали за 3,1 процент на годишно ниво во септември на 2 милијарди швајцарски франци (околу 2,1 милијарди евра).

Без падот во Соединетите Американски Држави, извозот би се зголемил за 7,8 проценти, соопшти федерацијата. Во исто време, извозот на фармацевтски производи од Швајцарија во САД се зголеми за 43 проценти на сезонски прилагодена основа во споредба со август, според податоците од Министерството за финансии. Вкупниот швајцарски извоз се зголеми за 3,4 проценти на 22,8 милијарди франци, потпомогнат од раните испораки на лекови пред да стапат во сила новите 100-процентни царини што ги објави претседателот Доналд Трамп. Фармацевтските компании Рош и Новартис изјавија дека не очекуваат сериозно влијание врз нивниот бизнис поради проширувањето на нивното производство во САД, пренесува БТА.