Поранешната британска тенисерка, Анабел Крофт која сега работи како аналитичар, во својата анализа пред стартот на последниот годинешен грен слем турнир, УС Опен, зборуваше за Новак Ѓоковиќ и тоа што му го прави  публиката во Њујорк.

Ѓоковиќ е главен фаворит за титулата на грен слем турнирот кој започнува в понеделник, но покрај младите тенисери како Данил Медведев, Стефанос Циципас и Александер Зверев, извесно е дека противник ќе му биде и публиката.

– Понекогаш е болно да се гледа, се сеќавам дека бев на УС Опен во 2015 година кога Новак играше против Федерер и изгледаше дека целиот стадион е против него. Имаше тишина кога ќе погодеше винер и ќе освоеше поен, а навивање кога ќе промашеше. Сепак, храброста која ја покажа за да победи на тој дуел беше неверојатна. Јас бев покрај теренот и не можам да верувам дека 20.000 луѓе ја сакаа неговата крв и се надеваа дека ќе загуби. Беше брутално на многу начини. Тоа е како да гледате гладијатор кого сите сакаат да го распарчат на парчиња. Сè уште ми поминуваат морници кога ќе се сетам на тие моменти, а тој не се вознемири. Беше емотивно добро подготвен да се носи со такво нешто. Навистина беше импресивно како изгледаше на теренот – вели Крофт.

Поранешната тенисерка вели дека на крајот Новак Ѓоковиќ сепак ќе ја добие љубовта од навивачите во Њујорк и дека нешто слично се случуваше и со Џон Мекинро во 1980-тите години.

– Навистина се надевам дека ќе ја добие љубовта и почестите кои ги заслужува со оглед на сите постигнување кои ги оствари. Израснав во ерата на Џон Мекинро кој беше непопуларен во 1980-тите години. Беше означен како лошо момче и непријател на тенисот, а некој тогаш ми кажа дека со тек на времето ќе ја добие љубовта од навивачите и мислам дека истото ќе се случи и со Ѓоковиќ. Мене навистина ми е интересно кога го интервјуирам Ѓоковиќ. Се обидува да дознае информации буквално за се. Не можам доволно да кажам и да опишам колку ми е жал што не ја добива поддршката која сигурно ја заслужува – вели Анабел Крофт.