Брнабиќ: Членството во ЕУ е стратешка цел, важен сигнал за другите земји на Балканот
Членството во Европската унија е стратешка цел на Србија, изјави премиерката Ана Брнабиќ на онлајн самитот под назив „Нејзината моќ” во организација од магазинот „Форин полиси” и посочи дека е важно и другите земји од регионот да постигнат напредок во европскиот пат.
Ана Брнабиќ истакна дека за стабилноста на регионот, од големо значење е Европската унија (ЕУ) да даде позитивен сигнал и за другите земји од Западен Балкан, особено за Северна Македонија и Албанија.
„Тоа е важно за стабилноста, интеграцијата на Западен Балкан е во интерес на ЕУ, на земјите од регионот, на сите нас“, посочи Брнабиќ, пренесува РТС.
Препознаен напредок на Србија
Коментирајќи го последниот извештај на Европската комисија за напредокот на Србија во евроинтеграциите, Брнабиќ изјави дека е препознаен напредокот на Србија во сите области.
„По неколку години Србија има толку позитивен извештај и препорака од Европската комисија за отворање два кластера“, кажа Брнабиќ, додавајќи дека сега работат со секоја земја-членка поединечно бидејќи од нив зависи дали тие два кластера ќе бидат отворени на Меѓувладината конференција.
Брнабиќ истакна дека Србија продолжува со реформите, не само поради евроинтеграциите, туку и поради напредокот на целото општество во Србија.
Ескобар: Политичарите на Балканот треба да се занимаваат со иднината, а не со минатото