Браќата Стојановски и Андоноски остануваат под договор со МЗТ Скопје Аеродром
Претставувањето на тимот со кој ќе настапува МЗТ Скопје во новата сезона го почнува со кошаркарите за кои и немаше дилеми дека ќе го носат дресот на клубот од Аеродром на патот кон одбраната на двојната круна на домашна сцена, како и што подобриот пласман во АБА2 лигата, каде што ќе брка враќање во јадранската елита.
МЗТ и во следните 365 дена во составот повторно ќе го има капитенот Дамјан Стојановски, заштитниот знак и една од најголемите клупски легенди во историјата, кој ќе ја одработи втората година од договорот потпишан минатото лето.
Крај него ќе биде уште една легенда на макбаскетот, неговиот брат-близнак, Војдан Стојановски, кој исто така има уште една сезона за играње во „сино-белиот“ дрес.
Договорна обврска со клубот од претходно, барем од делот на сениорскиот ростер, има и Андреј Андоноски, чиј талент е неоспорен, кој блесна во финишот од минатата сезона и од кого се очекува уште повеќе во иднина.
Во текот на вчерашниот ден МЗТ објави дека и следната сезона тренер ќе биде Васко Атанасов.