Атанасов и следната сезона ќе биде прв тренер на МЗТ Скопје Аеродром
Актуелниот македонски кошаркарски шампион објави дека Васко Атанасов и во следната сезона ќе биде прв тренер на МЗТ Скопје Аеродром.
Станува збор за 29-годишен перспективен стратег, одамна е дел од МЗТ, прво како дел од младинската школа, а потоа и како помошник во стручниот штаб.
По заминувањето на Драган Николиќ пред крајот на минатото првенство, Атанасов го прифати предизвикот и лидерската палка и успешно го доведе тимот до посакуваната шампионска титула – десетта во клупската историја.
Претходно водеше неколку екипи како прв тренер и тоа БАС Академи, Струмица и молдавскиот прволигаш Адмиралс.
Воедно дел од стручниот штаб на МЗТ од следната сезона ќе биде и повратникот во тимот, Никола Велев, кој се враќа во „сино-белиот“ табор по двегодишниот престој во ТФТ.