Јута џез направи размена со Детроит пистонс во кој го испрати најдобриот хрватски кошаркар Бојан Богдановиќ, објави „ЕСПН“.

Клубот од Солт Лејк Сити на тој начин го комплетираше заминувањето на тројца од своите најдобри играчи во паузата меѓу две сезони. Претходно клубот го напуштија Руди Гобер и Донован Мичел, а сега и првиот клупски стрелец Богдановиќ, кој минатата сезона имаше просек од 18,1 поени по натпревар.

И додека Богдановиќ се сели во Детроит, во спротивна насока ќе тргнат Кели Олиник и Сејбен Ли, двајца речиси потпросечни играчи.

За 33-годишниот Богдановиќ Детроит ќе биде петтиот клуб во неговата НБА кариера, претходно ги бранеше боите на Бруклин, Вашингтон, Индијана и Јута.

Детроит со години е меѓу најслабите клубови во НБА, па минатата сезона беше претпоследна екипа во Источната конференција со скор 23-59. Првото име на клубот е Кејд Канингем, минатогодишниот прв пик на драфтот во НБА.