Бенкси повторно провоцира: На ѕид од затвор нацрта затвореник во бегство
Познатиот уметник Бенкси повторно се најде во центарот на вниманието. Овој пат, тој „ординирал“ во англискиот град Рединг, каде во текот на ноќта дошол до поранешниот локален затвор и го украсил неговиот ѕид. И тоа на провокативен начин. Имено, Бенкси нацртал затвореник како бега од истиот тој затвор.
Дека тој е автор на ова дело, уметникот потврди на својот инстаграм-профил, каде објави кратко видео во кое се гледа како го направил сето тоа.
Сликата го прикажува затвореникот како се лизга низ јажето направено од чаршафи, што се поврзани и закотвени со машина за пишување. Според Би-би-си, некои набљудувачи забележале сличност помеѓу затвореникот во обидот за бегство и најпознатиот затвореник од Рединг, Оскар Вајлд, кој беше осуден на две години тешка работа во овој затвор, и кој излегувањето на слобода го прослави со песната „The Ballad of Reading Gaol“.
Сликата се појави за време на кампањата – поранешниот затвор да се претвори во уметнички центар, наместо да се продаде на инвеститори. Владата го продава затворот од 2019 година.
Многумина коментираа дека Бенкси се надминал себеси.