Белата куќа соопшти дека е „огорчена“ од израелскиот напад во кој загинаа седум хуманитарни работници од меѓународната добротворна група „World Central Kitchen“ и испрати сочувство до организацијата.

Координаторот на Советот за национална безбедност за стратешки комуникации, Џон Кирби, призна дека е спроведена прелиминарна истрага, но рече дека се очекува пошироката истрага да биде спроведена и тоа да се направи на брз и сеопфатен начин, пренесе „Асошиејтед прес“.

„Се надеваме дека тие наоди ќе бидат јавно објавени и дека ќе има соодветна одговорност, додаде Кирби.

Прес секретарот на Белата куќа, Карин Жан-Пјер, изјави за новинарите дека претседателот Џо Бајден лично се јавил на основачот на добротворната група, Хозе Андрес, за да му изрази сочувство.

„Претседателот пренесе дека јасно ќе му стави до знаење на Израел дека работниците од хуманитарната помош мора да бидат заштитени“, рече таа.

Светската централна кујна ја прекина испораката на храна за гладните Палестинци.

Организацијата соопшти дека се координирала со израелската војска околу движењето на автомобилите со работниците додека тие ја напуштале северна Газа доцна во понеделникот.

Снимката од последиците покажа возило со логото на добротворната организација испечатено преку неговиот покрив за да може да се препознае од воздух.

Проектилот пробил голема дупка низ покривот. Две други возила во конвојот беа запалени и искршени, што укажува на повеќекратни удари.

Други снимки ги покажаа телата, неколкумина носеа заштитна опрема со логото на добротворната организација, во болница во градот Деир ал-Балах во централна Газа.

Меѓу убиените има тројца британски државјани, еден Австралијанец, еден полски државјанин, едно лице со двојно американско-канадско државјанство и еден Палестинец.

Загинатите беа граѓани на некои од најблиските сојузници на Израел, што може да ги антагонизира во време кога земјата има малку пријатели во услови на зголемени меѓународни критики за нејзината речиси 6-месечна офанзива во Газа.