Апелациониот суд Скопје му ја одбил жалбата на Стојанче Јовановски, кој е првостепено осуден дека ја навел сопругата Ивана во прегратка со својата ќерка да скокне од балкон и за долгогодишно семејно насилство, и ја потврдил 12-годишната затворска казна која му ја изрече Кривичниот суд.

-Апелациониот суд Скопје во интерес на јавноста и медиумите информира дека, постапувајќи по кривичниот предмет КЖ-549/26, по одржана јавна седница на 18.06.2026 година, донесе пресуда со која ја одби како неоснована жалбата на обвинетиот Стојанче Јовановски од Скопје и ја потврди пресудата на Основниот кривичен суд Скопје К.бр.551/26 од 07.05.2026 година – соопшти попладнево Апелациониот суд.

Од Судот најавуваат дека ќе биде објавена целата одлука.

12 години затвор за Стојанче Јовановски – виновен е и за наведување на самоубиство на Ивана

Јовановски во мај беше осуден на 12 години затвор за семејно насилство, загрозување на сигурноста и наведување на самоубиство.

Трагедијата се случи на 2 март годинава, кога Ивана го загуби животот, скокајќи од балкон заедно со нивната шестгодишна ќерка Катја. Во судската постапка беше утврдено дека Јовановски континуирано ја тепал, а последното насилство се случило пред самиот чин на самоубиство кога Ивана пријавила во полиција, но кога дошле, се премислила.

Насилството кое Ивана и девојчето го трпеле со години било пријавувано во полиција, а за постапувањето во случајот беа утврдени професионални пропусти кај дури 39 полицајци.

Сведочи мајката на Ивана: „Бабо, јас ќе ти кажам, мама чучна долу и тато ја шутираше“