Интерпол денес објави фотографија заедно со идентитетот на жената осомничена за бомбашкиот напад во Монако, чија цел беше украинскиот тајкун Вадим Јермолаев, пренесува АП.

Интерпол објави црвена потерница на својата веб-страница за 39-годишната Украинка Анастасија Березовски. Според потерницата, Березовски има тетоважа, веројатно од змија, на десната рака, од рамото до лактот. Се вели дека има и темна коса и зборува германски јазик.

Властите на Монако бараат нејзино апсење под сомнение за обид за убиство и други кривични дела. Осомничената оттогаш е видена во Германија.

Според снимките од безбедносните камери, таа при нападот се гледа со црна рибарска шапка, со цел да не биде препознаена.

Нападот се случил во понеделникот вечерта, кога непознато лице оставило пакет во влезот на станбена зграда во Монако. Набргу потоа одекнала силна експлозија, при што биле повредени три лица.

Жена маскирана како маж ја оставила бомбата во Монако

Истрагата се води како обид за убиство, а не како терористички напад. По детонацијата, осомничената била забележана како бега кон француската општина Босолеј, која се наоѓа веднаш до границата со Монако.

Иако властите официјално не ги објавија имињата на повредените, локалните медиуми пишуваат дека цел на нападот бил 58-годишниот Вадим Јермолаев, инвеститор во недвижности кој со години живее во Монако. Тој во 2019 година се откажал од украинското државјанство и станал државјанин на Кипар.

ВИДЕО | Украински олигарх и неговото семејство се повредени во бомбашки напад во Монако