Автобус рано утринава се стркала од автопат во провалија во југозападен Пакистан, при што загинаа најмалку 40 патници, објави „Ал џезира“.

„Патнички автобус што патувал од Квета кон Пешавар паднал во длабока провалија во планинската област Дхана Сар. Автобусот паднал приближно 70 до 80 стапки (21 до 24 метри) во провалијата“, изјави Санаула Шерани, раководител на центарот за итни случаи во округот Жоб.

Автобусот, кој се движел со голема брзина, изгубил контрола и паднал во карпестата провалија во оддалечена област во близина на границата меѓу провинциите Белуџистан и Хајбер Пахтунхва, изјави Шахид Ринд, портпарол на владата на Белуџистан.

И двете официјални лица соопштија дека 40 луѓе загинаа, а најмалку осум се повредени.

Ринд наведе дека во автобусот имало и патници од друг автобус кој претходно се расипал, поради што возилото било преполнето.

❗️🇵🇰 At least 40 killed after bus falls into ravine in #Pakistan. pic.twitter.com/3u203wzgrP

— APA News Agency (@APA_English) July 3, 2026

Полицискиот службеник Мохамед Насир изјави дека најверојатно причина за несреќата била брзото возење, но дека е покрената истрага за утврдување на точната причина.

Спасувачки тимови од двете провинции Белуџистан и Хајбер Пахтунхва биле на терен.

„Бидејќи несреќата се случила во тешко пристапна планинска област, спасувачките тимови се соочија со значителни тешкотии во почетната фаза од операцијата“, изјави Шерани.

Портпаролот на службата за спасување, Фазал Дин, изјави дека тимовите користеле алатки и машини за извлекување на телата и на повредените од автобусот. Локалните власти соопштија дека се работи на идентификација на загинатите.

Претседателот на Пакистан, Асиф Али Зардари, изрази жалење за несреќата и сочувство до семејствата на жртвите, посакувајќи им брзо закрепнување на повредените.

Сообраќајните несреќи се чести во Пакистан поради слаба примена на сообраќајните закони, брзо возење, лоши стандарди за безбедност на патиштата и несовесно возење.

Во мај, минибус удрил во автобус паркиран покрај автопат во северозападен Пакистан, при што загинале 17 луѓе, а петмина биле повредени.

Трагедија во Пакистан: 18 мртви во ужасна автобуска несреќа