Опремен само со марама и голи раце, 42-годишниот Кларенс Чуа спасува пчели во Сингапур, ставајќи цели гнезда во дрвени кутии и преместувајќи ги на безбедни места, честопати во својот двор, пишува „Ројтерс“.

– Она што ми се допаѓа кај нив е тоа што ако ги почитувате и не им се заканувате, тие ќе ви дозволат да влезете во нивниот простор – рекол Чуа.

Кога жителите на тропскиот Сингапур откриваат пчели како се гнездат во нивните домови, тие обично повикуваат специјализирана компанија која може да ги уништи за неколку минути за надомест од 60 до 100 долари.

Но, Чуа убедил многумина од нив да му дозволат да ги премести за околу 50 долари.

Во текот на изминатите шест години, тој преместувал просечно околу 100 колонии годишно, спасувајќи шест милиони пчели.

Тој преместувал цели колонии, зачувувајќи ја матицата, пчелите работнички и леглото.

Чуа преместил пчели од различни егзотични локации, од куќи до мотори на авиони. Денес, неговите услуги се сè повеќе барани од локалните комисии за домување кои управуваат со станбените населби во кои живеат 80 проценти од населението на Сингапур.