Американскиот претседател Џо Бајден му наредил на шефот на Тајната служба да ги преиспита сите безбедносни мерки преземени пред републиканската конвенција, објави тој вечерва.

Бајден повика и на истрага за тоа што се случи на предизборниот митинг на Доналд Трамп и јавно ќе ги објави резултатите, додаде тој, истакнувајќи дека повикал на „темелна и брза“ истрага.

Американскиот претседател ја изрази „својата благодарност“ што Трамп е добро и рече дека синоќа имале „краток, но добар“ разговор. Тој изрази и сочувство до семејството на убиениот.

Бајден рече дека ќе и се обрати на американската нација вечерва во 20 часот од Овалната соба за да ја истакне потребата за единство.

„Во Америка нема место за вакво насилство или какво било насилство. Обидот за атентат е против сето она за кое се залагаме (…) како нација“, рече тој, додавајќи: „Ќе зборуваме подетално вечерва“.

Осврнувајќи се на мотивите на напаѓачот, тој рече дека во моментов нема информации. Тој ги повика Американците „да не прават претпоставки“ за неговите мотиви или политички став.