Австралија Опен: Новак Ѓоковиќ рутински до деветтото финале во Мелбурн
Првиот носител и бранител на трофејот на Австралија Опен, во полуфиналето го имаше најлесниот меч во Мелбурн, победувајќи го Аслан Карацев во три сите со 6:3,6:4,6:2.
Ова ќе биде деветто финале за Ѓоковиќ на Австралија Опен во кое ќе се обиде да дојде до деветтата титула во Мелбурн, а 18. грен слем титула во кариерата.
Карацев добро го започна дуелот со фаворитот и покажа зашто се најде во полуфиналето и е најпријатното изненадување на Австралија Опен. Русинот кој преку квалификациите дојде до главниот жреп, потоа и до полуфинале, не се плашеше да влезе во долга размена на поени, но тоа траеше се до моментот кога Ѓоковиќ успеа да најде начин да му го „прочита“ сервисот и направи брејк. Брејкот се случи во осмиот гем и него Ѓоковиќ го направи со нула на противникот, по што со сигурен сервис дојде до водство од 1:0 во сетови.
Во вториот сет, Ѓоковиќ брзо направи два брејка и поведе со 4:1, но рускиот тенисер не се предаваше, успеа да врати еден брејк но немаше сили за ново изненадување.
Во третиот сет, Србинот веднаш го одзеде сервисот на Карацев и поведе со 2:0 но Русинот експресно возврати и на момент ја врати неизвесноста. Но, Ѓоковиќ уште еднаш покажа зашто е еден од најдобрите тенисери во историјата и со два брејка и серија од четири гема по ред, дојде до конечен тирумф и пласман во финалето.
Противник на Ѓоковиќ во финалето ќе му биде подобриот од дуелот помеѓу Данил Медведев и Стефанос Циципас кои ќе играат утре.