В сабота кошаркарите на МЗТ Скопје Аеродром ќе го играат возвратниот натпревар од полуфиналето во АБА 2 лигата против Спартак Суботица од 19.00 часот.

Во првиот меч српската екипа триумфираше против актуелниот македонски шампион со резултат 85:80.

И покрај поразот, тренерот на „металците“ Васко Атанасов верува дека неговите играчи ќе го дадат максимумот на реваншот да се анулира негативата и со пресврт обезбедат финале.

– Нема предавање, без разлика што мечот ќе го почнеме со стартна негатива. Изминатава недела работевме на исправање на покажаните слабости, како и на пронаоѓање нови начини како би можеле да го изненадиме силниот противник. Наша цел е да се бориме до последниот атом енергија, да дадеме сè од себе и да пробаме да вратиме на идентичен начин. Нема да биде лесно, Спартак Суботица е квалитетен тим со голем буџет и големи амбиции, но тоа нема да значи дека нема да ги примораме сериозно да се испотат ако сакаат да дојдат до финалето. Очекувам возбудлив и до крај неизвесен меч во кој пак ќе решаваат финеси – вели Атанасов.

Своите очекувања за утрешниот дуел ги сподели и играчот на МЗТ, Ејасу Ворку:

– Ситуацијата во која се најдовме не е лесна, но не е ни безизлезна. Повторно сè зависи од нас самите и од начинот на кој ќе одиграме. Ќе мора малку повеќе да веруваме со сопствените можности и да бидеме поагресивни. Ако го сториме тоа ќе имаме можност ако ништо друго до крајот на средбата да бидеме во можност да ја надополниме негативата од Скопје.