Менаџерот на фудбалерите на Арсенал, Микел Артета изјави дека убедливата победа против ПСВ во Лигата на шампионите донесе радост, самодоверба и верба кај неговите играчи, но дека не го занесуваат рекордите.

Арсенал синоќа во Ајндховен го совлада ПСВ со 7:1, во првиот осминафинален натпревар од Лигата на шампионите. Ова е првпат во историјата на натпреварувањето тим да постигне седум гола на гостински терен во нокаут фазата од Лигата на шампионите.

– Сигурно, тоа е нешто што никој не го направил и прекрасно е да се биде дел од него. Но, како тим сакаме да постигнеме многу други работи кои се многу поважни од тоа. Најсреќно е што сме во многу силна позиција да се пласираме во следната рунда, каде што сакаме да бидеме – рече Артета, пренесе Скај.

Реваншот помеѓу Арсенал и ПСВ е закажан за 12 март во Лондон.

Арсенал не успеа да постигне гол на претходните два натпревари, ремито против Нотингем форест и поразот од Вест Хем со 0:1, па многумина не очекуваа убедлива победа во Ајндховен.

Арсенал постигна најмногу голови во еден натпревар минатата ноќ во последните 13 години, по победата со 7:3 над Њукасл во Премиер лигата.