Апасиев закажа нова Комисија за Кочани – на неа ќе може да се обратат родителите на загинатите
Пратеникот и лидер на опозициската Левица кој е и претседател на Постојаната анкетна комисија за заштита на човековите слободи и права за на 9 декември закажа седница на Комисијата по поднесена претставка од Здружението на родителите на загинатите деца од Кочани и на оваа седница ќе може да се обратат родителите.
Препорачано
– Сметам дека ова е во највисок јавен интерес и поради тоа седницата ја закажав согласно моите деловнички овластувања за на 9 декември 2025 година, со цел да не се поклопи со распоредот на судења кој што е објавен од судот, бидејќи судењата се чести и симболично 10 декември е Светскиот ден човековите слободи и права, а родителите во нивната претставка се повикуваат токму на правото на живот како највисоко право коешто остана незаштитено ноќта на трагедијата. Оттука, ова мое циркуларно писмо е доставено до сите членови, заменици на Постојаната анкетна комисија и како поканети се дополнително собранискиот претседател, потпретседателите, координаторите на пратеничките групи, премиерот, министерот за внатрешни работи, претседателот на Република Македонија и подносителите на претставката. Тоа значи дека и подносителите на претставката ќе имаат право да се обратат на оваа седница. Мислам дека ќе се постигне една институционална бариера да се скрши, а тоа е конечно родителите на тие деца да имаат право да се обратат од Собранието, затоа што тоа досега им беше целосно оневозможено – рече Апасиев.
Ова како што објасни Апасиев е редовна седница на Постојаната анкетна комисија, а не надзорна или јавна расправа, односно иницијативата на власта за Анкетна комисија за сите трагедии е друга анкетна комисија.
-Таа ќе биде ад-хок комисија која треба да 45 дена или два месеци да заврши со квази истражни функции. Бидејќи ние по закон и Деловник не смееме да истражуваме како Јавното обвинителство, но можеме да лоцираме политичка одговорност. Значи, мојата Комисија со која јас претседавам е Постојана анкетна комисија и таа редовно си работи без оглед на овие две, а овие две едната од ВМРО-ДПМНЕ и другата од опозицијата се посебни анкетни комисии кои се ад-хок тела и кои се уште не се формирани. Има само иницијатива, рече Апасиев.
