Претседателот на Левица, Димитар Апасиев се огласи со објаснување по предложениот закон со кој ќе се прогласи просторот околу Собранието за безбедносна зона. Тој тврди дека со законот не се забрануваат протести, туку, како што вели, целта е да се национализира приватната парцела околу Собранието на министерот за внатрешни работи Панче Тошковкси.

„Ај да не бидеме незрели и наивни… Целта на Законот за безбедносна зона околу Собранието е да му ја национализираме приватната парцела на клиентот на Панче Тошковски (вмровска фирма која у време грујово си го “купила” тревникот позади парламентот кај Дом на АРМ, сакајќи да гради лепенка) – а не да се забрануваат протести!

Согласно котите, булеварот пред Собрание си останува слободен за протести. Не наседнувајте на секој спин, новинарска патка и “кромид вест”, мајке ми. Проверете“ напиша Апасиев на Фејсбук.

Вчера во Собранието беше предложен закон со кој ќе се прогласи просторот околу законодавниот дом за безбедносна зона. Како автор на предлогот, кој се разгледува во скратена постапка, е потпишан лично претседателот на Собранието, Африм Гаши, заедно со колегата од „Вреди“, Беким Ќоку. Покрај нив двајца, овој предлог е поддржан и од претставници на сите други пратенички групи: Блерим Беџети, Борислав Крмов, Весна Бендевска, Никола Мицевски и Оливер Спасовски.

Пратениците здружено и во итна постапка забрануваат секакви собири пред Собранието