Анчелоти беше многу лут: Модриќ требаше да го шутира пеналот
Со голот на Џуд Белингем, Реал Мадрид синоќа ја совлада Селта на гостински терен (1:0) и по три кола го задржа беспрекорниот настап во „Ла Лига“.
Белингем ја затресе мрежата во 81 минута, но гостите можеа и порано да постигнат гол. Во 68 минута беше досуден пенал за „кралевите“, но Родриго беше непрецизен. Тоа доста го налути тренерот на Реал, Карло Анчелоти.
– Позната е хиерархијата на изведувачите на пенали. Винисиус е прв, а Модриќ втор. Бидејќи Винисиус порано ја напушти играта поради повреда, а Модриќ беше на теренот, тогаш тој мора да шутира. Тој го знае тоа и мораше да го изведе. Сепак тоа Родриго го направи. Не знам зошто Модриќ го дозволи тоа, бидејќи не само што знае дека тој е изведувачот, туку и пред овој пенал му кажав дека мора да шутира. Играчите не одлучуваат кој ќе го изведе пеналот, туку јас – беше јасен Анчелоти.
На прашањето на новинарите дали е лут поради тоа, Анчелоти одговори.
– Да, лут сум. Затоа што Модриќ требаше да шутира и тој го знае тоа, но Родриго сепак го изведе. Не знам зошто Лука не го направи тоа, но сигурно ќе разговараме за тоа во наредните денови – вели Анчелоти.