Десетмина алпинисти од Непал само што влегоа во историјата на планинарењето, откако денеска го искачија на 8.611 метри надморска височина и го освоија врвот „К2“ – вториот највисок врв на светот.

Врвот „К2“ се наоѓа во северниот дел на Пакистан, во непосредна близина на границата со Кина. До денес, важеше за последниот врв со висина од 8.000 метри кој ниту еден тим не успеа да го искачи во зима.

Ова е еден од најтешките и најопасни врвови за искачување во светот. За жал, при денешното искачување загинал шпанскиот алпинист Серхи Минготе.

„Историја за човештвото, историја за Непал!“, напиша Нирмал Пурџа на својот инстаграм-профил.

Овој успех е резултат на исклучителна соработка на група непалски планинари, кои поделени во два тима се качувале кон врвот, и во последниот дел од качувањето се здружиле и заедно стигнале до врвот.

„Ова е многу посебен момент. На десет метри под врвот, се собравме сите за да формираме група која заедно ќе стапне на врвот, додека ја пее непалската химна“, изјави Пурџа.

Многумина го сметаат искачувањето на врвот „К2“ за потешко и поризично дури и од Монт Еверест.

Оваа зима е предвидено уште едно искачување, од тим составен од планинари од целиот свет, кои се дел од три меѓународни експедиции.