Концентрациите на полен се високи овие денови, а многумина што страдаат од поленска треска ги чувствуваат симптомите дури и во затворен простор. Фармацевтка предупредува дека во вашиот дом може да се кријат два „тајни магнети за полен“ кои ја влошуваат состојбата.

Главната фармацевтка на лекарскиот синџир „Бутс“, Клер Невинсон, објаснила дека дел од вината може да лежи во ормарите и домашните миленици, пишува британски „Експрес“.

Облека и сушење алишта

Клер Невинсон истакнува дека облеката, косата, па дури и чевлите можат несвесно да го пренесат поленот.

– Облеката, косата, па дури и чевлите можат да станат несвесни преносители на поленот. По престојот на отворено, овие предмети внесуваат алергени во вашиот дом, што доведува до постојана изложеност дури и кога сте внатре – објаснила таа.

Дополнителен проблем претставува сушењето алишта на отворено.

– Сушењето на алиштата надвор во деновите со висока концентрација на полен исто така може вашата чиста облека да ја натопи со ситни честички на полен. Наместо тоа, обидете се да ги сушите алиштата внатре во деновите со највисока концентрација на полен за да ја намалите количината што може да се залепи на облеката и постелнината – советува Невинсон.

Домашните миленици како извор на полен

Друг значаен извор на полен во домот се домашните миленици. Животните можат да соберат честички на полен додека се движат надвор и да ги внесат во куќата на своето крзно и шепите.

– Сите ги сакаме своите домашни миленици, но за жал, нивното крзно и шепите можат да дејствуваат како магнети за полен кога се надвор. Кога ќе се вратат внатре, можат тие алергени да ги остават низ целиот дом и да предизвикаат неочекувано влошување на симптомите на поленска треска – предупредила Невинсон.

Таа нуди неколку едноставни решенија за сопствениците на домашни миленици.

– Неколку мали промени можат да направат голема разлика.Нежно избришете го крзното и шепите на домашниот миленик со влажна крпа откако бил надвор и редовно четкајте го надвор за да ја намалите количината на полен што се внесува во домот. Држењето на домашните миленици надвор од спалната соба може да помогне и во создавање средина за спиење без полен – рекла таа.

„Астма од грмотевици“

Со оглед на можноста за грмотевици, Невинсон предупредила и за т. н. „ефект на грмотевици“.

– Можеби мислите дека поројниот дожд го прочистува воздухот, но силните грмотевици всушност можат да ја влошат поленската треска – рекла таа, па објаснила како се случува ова: „Интензивните временски прилики ги разбиваат поленските зрна на мошне помали фрагменти, кои полесно можат да се вдишат длабоко во белите дробови“.

– Овој феномен, понекогаш познат како „астма од грмотевици“, може да доведе до ненадејни, тешки симптоми како што се свирење во белите дробови и стегање во градите, дури и кај оние кои инаку имаат само блага поленска треска. Во текот на бури со грмотевици, особено во сезоната на поленска треска, најдобро е да се ограничи изложеноста на полен и да се остане во затворен простор со затворени прозорци и врати – заклучила таа.

Општи совети за борба против поленот

Освен наведеното, симптомите во домот може да ги ублажат и други мерки. Се препорачува да ги држите прозорците затворени, да се туширате пред спиење и да нанесете вазелин или специјализиран балсам околу рабовите на ноздрите за да го запрете поленот.

Доволното внесување течности помага да се одржи влажноста на носните патишта и да се разреди слузта, што го олеснува нејзиното исфрлање. За конкретни производи како што се антихистаминиците, капките за очи и спрејовите за нос, најдобро е да побарате совет од лекар.