За 13 месеци треба да биде подготвен Акцискиот план „Скопје – зелен град“, со што Скопје ќе биде првиот град во државата што ќе се вклучи во мрежата на зелени градови, проект поддржан од Европската банка за обнова и развој. Со имплементацијата на овој проект ќе се постават темелите за реализација на низа идни проекти поврзани со животната средина, информираат од Град Скопје.

На денешниот воведен состанок и работилница која се одржа во хотелот „Холидеј ин“, покрај претставници од Европската банка за обнова и развој (ЕБОР), присуствуваше и градоначалникот Петре Шилегов кој нагласи дека полека станува реалност визијата Скопје да стане европска зелена престолнина. Според него, изработката на Акцискиот план „Скопје зелен град“ значи фокусирање на низа предизвици. Шилегов нагласи дека градската власт веќе презела конкретни чекори за унапредување на животната средина, како што е на пример набавката на автобуси на гас.

Во изработката на Акцискиот план, како што рече градскиот татко, фокусот ќе се стави врз сообраќајот, градежните објекти, водата, воздухот. Планот ќе се изработува 13 месеци, а потоа него треба да го усвои Советот на Град Скопје. Во него ќе бидат опфатени и приоритетите што треба да се реализираат на краток и среден рок.

Со проектот ќе раководи Најџел Јованс од ЕБОР.