Од Управата за хидрометеоролошки работи (УХМР) денеска најавија обилни врнежи во крајните јужни и југоисточни делови на земјата, како резултат на циклонска активност за време на ноќта и утрешниот ден.

Според УХМР, се очекува зголемен водостој на реките и суводолиците во јужните и југоисточните региони. Особено е можно висок водостој во сливот на реката Струмица и Струмичкиот регион, на реката Анска и другите помали реки и суводолници во Гевгелиско-Валандовскиот регион (река Калковска) и Дојранскиот регион. Високи водостои се можни и во крајниот долен дел од сливот на река Вардар, на водотеците од планинскиот масив Кожув (реки Бошава, Дошница, Коњска, Кованска, Серменинска, Петрова и други), во Битолскиот дел од сливот на Црна река (река Елешка), како и во Охридско-Преспанскиот регион.

Доколку се остварат прогнозите за количините на врнежи, можно е на места да дојде до локални излевања во наведените речни сливови. Во тој случај, помалите реки и суводолници може да се активираат и да предизвикаат излевања на одредени локации.

УХМР апелира до граѓаните да бидат внимателни при движење покрај реките и суводолиците во јужните и југоисточните делови на земјата во текот на утрешниот ден.

Исто така, е издадено „жолто“ ниво за предупредување од поплави, поради постоење потенцијална опасност од локално излевање на реките и суводолниците во овие региони.