Европскиот совет усвои регулатива со која се воведуваат пакет мерки за зајакнување на конкурентноста и отпорноста на винскиот сектор во Европската Унија. Како што е најавено, целта е подобро да се усогласат понудата и побарувачката, да се зајакне адаптацијата кон климатските промени, да се поттикне иновацијата и да се обезбеди дополнителна поддршка за руралната економија, вклучително и развојот на винскиот туризам.

Како што објави „Agronews“, меѓу мерките е и можноста земјите членки да го поддржат отстранувањето на вишокот лози со цел да се спречи поплавување на пазарот и да се зачува стабилноста. Исто така, се укинува рокот за системот за права за садење, воведувајќи период на преглед од десет години. Во исто време, земјите членки на ЕУ ќе можат да ги зголемат инвестициите поврзани со климата – вклучително и ублажување и прилагодување – до 80 проценти од прифатливите трошоци, со цел да се забрза транзицијата кон поодржливо производство, објавува „europa.eu“- пренесува Политика.

Регулативата, исто така, воведува поедноставени, хармонизирани правила за етикетирање низ цела ЕУ, со дигитални етикети и пиктограми, што треба да ги намали административните трошоци и да ја олесни прекуграничната трговија. Етикетите за производи со помала содржина на алкохол исто така се разјаснуваат: „безалкохолно“ за вина со помалку од 0,5 проценти алкохол, „0,0 проценти“ за производи со помалку од 0,05 проценти, додека вината со намалена содржина на алкохол (над 0,5 проценти, но најмалку 30 проценти пониска од стандардната јачина) ќе бидат означени како „со намалена содржина на алкохол“. Причината за ова поместување во производството и етикетирањето лежи во фактот дека виното со нула проценти алкохол е познато како безалкохолно вино, кое е сè попопуларно, особено кај младите. Според експертите, се прави со користење на технологијата на отстранување на алкохол (деалкохолизација) од обичното вино, а воедно се задржуваат аромите.