„Гугл“ воведува вештачка интелигенција што би можела значително да го промени начинот на кој корисниците резервираат хотели и ги планираат своите патувања.

Според соопштението на Здружението на хотелско-угостителската индустрија ХОРЕС, компанијата ги проширува своите функционалности со нови алатки за персонализирано планирање патувања, локално пребарување со вештачка интелигенција и следење на цените на хотелите преку сервисите за пребарување и патувања.

Новата опција ќе им овозможи на корисниците да ги следат промените на цените на хотелското сместување и да добиваат известувања кога цените за избрани дестинации и термини ќе се намалат. Воедно, алатките базирани на вештачка интелигенција дополнително ќе го унапредат пребарувањето на хотели, ресторани и туристички содржини преку персонализирани препораки и разговорно пребарување.

„За време на конференцијата за развивачи Гугл Ај/О (Google I/O), компанијата потврди дека хотелите ќе станат дел од нејзиниот систем Универзален трговски протокол – инфраструктура што ќе им овозможи на агенти со вештачка интелигенција да извршуваат купувања директно преку пребарување и разговорни интерфејси“, соопшти ХОРЕС.

Дополнително, компанијата претставила и систем за плаќање што би им овозможил на агентите со вештачка интелигенција самостојно да резервираат хотелско сместување, со што дополнително се приближува концептот на автоматизирани онлајн резервации.

Иако сè уште не е објавен точен рок за имплементација на новите функции, јасно е дека „Гугл“ сè повеќе ја трансформира туристичката претрага од класичен пребарувач во интерактивен асистент за планирање патувања и носење одлуки за резервации.

Од ХОРЕС оценуваат дека овие промени ќе имаат големо значење за хотелската и туристичката индустрија, бидејќи дигиталната видливост, локалната оптимизација за пребарувачи и квалитетното присуство во екосистемот на „Гугл“ ќе стануваат сè поважни за привлекување директни резервации и посетеност.