Пандемијата на коронавирусот ги натера Меѓународниот олимписки комитет (ИОК) и организаторот на Олимписките игри во Токио да направат преседан кој досега не се случил во историјата на Олимпизмот.

Освојувачите на олимписки медали на Игрите во Токио нема да имаат можност да ги добијат одличјата од претставници на ИОК со поздравување со рака, со прегратка или бакнеж, туку сами ќе мораат да ги обесат околу вратот, објави претседателот на ИОК, Томас Бах на виртуелната прес конференцијата со светските медиуми.

– Медалите нема да им бидат обесени околу врат на спортистите. Тие ќе бидат донесени до нив, по што самите спортисти ќе си ги земат. Личноста која ќе ги става медалите на „тацна“ ќе носи дезинфикувани ракавици и ќе носат маски, исто како и спортистите. Нема да има ракување, ниту прегратки за време на свеченето доделување на медалите – ја објасни Бах процедурата на доделување на медалите во Токио.

Локалните власти во Токио стравуваат од пандемијата на коронавирусот бидејќи бројот на заболени во главиот град на Јапонија се зголемува и поради тоа ќе има максимални мерки во Олимпиското село и на спортските борилишта за заштита од коронавирусот.

Во Токио денеска беа регистрирани рекордни 1.149 случаи на заболени од коронавирус, што е најголем број од 22. јануари оваа година, а здравствените власти во Јапонија стравуваат дека тоа е најава за петтиот бран на коронавирусот.
Организаторот на Игрите исто така одлучи да не биде дозволено присуство на гледачи на спортските борилишта.