Штип вечерва ќе го подигне погледот кон небото за да му оддаде почит на „човекот што светеше меѓу нас“ – Владимир Блажев – Панчо, кој почина на 14 октомври по долга и тешка битка од повредите здобиени во страшниот пожар во Кочани.

Во негова чест, граѓаните ќе се соберат во 20:00 часот на Градскиот плоштад под мотото „Ѕвездено небо во чест на Панчо“, симбол на светлината што ја остава зад себе.

Организаторите повикуваат сите што го познаваа, но и сите што сакаат да изразат поддршка и сочувство, да го споделат повикот и да присуствуваат.

„Небото да блеска како што Панчо блескаше со сите нас,“ стои во повикот што брзо се шири на социјалните мрежи.