Вујовиќ: Гаџа нема да патува со нас, секако не сме фаворити против Кил
В четврток (2 декември 2021 год.) екипата на Вардар 1961 ќе го игра својот деветти натпревар сезонава во ЕХФ Лигата на шампионите, а му гостува на германскиот Кил (20.45 часот).
Моментно во групата „А“ скопските „црвено-црни“ се наоѓаат на шестата позиција со пет бодови, а бундеслигашот е на третото место со 11.
Пред заминувањето за Кил, своите очекувањата ги сподели тренерот на Вардар 1961, Веселин Вујовиќ:
– Нè очекуваат три многу важни натпревари, првиот е во Кил каде што секако не сме фаворити, ниту една екипа во Европа не е фаворит во Кил. Би било многу важно за нас да одиграме еден добар натпревар, бидејќи тоа би било значајна мотивација за мечот во Загреб (8 декември) и дуелот во Битола против Еурофарм Пелистер (18 декември).
Што се однесува до составот, имаме проблем, Гаџа доби вироза и единствениот среден бек, класичен кој го имаме, нема да патува со нас, тоа ми прави многу проблеми. Се враќа Куни Моралес, иако не е 100% подготвен, но сепак да биде во контакт со самиот амбиент, за да не направи преголема пауза.
И голманот Борко Ристовски сè уште не се опоравил од проблемот кој го има веќе подолг период, јас се надевам дека и тоа брзо ќе се реши.
Од трите натпревари кои ги очекуваме, две победи би биле мелем за сите нас. Очекувам екипата да биде мотивирана, да го даде максимумот и на некој начин овој прв дел од сезоната го завршиме позитивно – рече Вујовиќ.