Вујо: Не исклучувам враќање во Вардар
Миленикот на „Комитите“ и поранешен тренер на Вардар и на македонската ракометна репрезентација, Веселин Вујовиќ, не отпишува враќање во „црвено-црните“, сега откако си замина Сергеј Самсоненко и клубот го презеде старо-новиот претседател, Михајло Михајловск.
Популарниот Вујо Мајсторе пред два дена ја напушти клупата на хрватскиот шампион Загреб ППД со што се подгреаја шпекулациите дека е можно враќање во Вардар, иако засега Вујовиќ демантира такво нешто, но не ја затвора вратата за кам-бек.
– Прво сакам да кажам дека заминувањето од Загреб воопшто не е некаков трик за да го преземам Вардар. Имам семејни работи кои во следните неколку месеци мора да ги завршам. Што се однесува околу шпекулациите за враќање во Вардар, тие гласини беа активирани уште веднаш откако беше објавено враќањето на Михајловски. Не ја исклучувам можноста да се вратам во Вардар, откако ќе ги решам моите приватни проблеми – Вујовиќ за медиумите во Црна Гора.