Вучиќ: Србија е подготвена да разговара за компромис
Вучиќ рече дека во неколку наврати повторил дека Србија не е за замрзнат конфликт.
„Србија секогаш е подготвена да разговара за компромисно решение. Но, никогаш нема да биде подготвена да разговара за какво било понижување на Србија“, изјави денеска српскиот претседател Александар Вучиќ.
Обраќајќи им се на граѓаните на Србија, Вучиќ рече дека сака да ја информира јавноста за состојбата во Косово и Метохија, како и за разговори со европскиот претставник Мирослав Лајчак и со американскиот претставник Метју Палмер.
„Тие разговорисе однесуваа првенствено на темите во идниот дијалог – што сакаме едни од други. Ние и Албанците, но и што очекуваме од ЕУ, како и што очекуваат тие од нас“, објасни тој.
Вучиќ рече дека во неколку наврати повторил дека Србија не е за замрзнат конфликт.
„Ние сакаме да ги решиме нашите конфликти од минатото и да не ги оставаме на нашите деца. Но, ние баравме разбирање за основните држави, интересите на Србија и народот, пред се за безбедноста на нашиот народ во Косово и Метохија“, рече тој.
Вучиќ посочи дека дијалогот ќе продолжи за многу краток временски период од денес, додавајќи дека станува збор за денови.