Ракометарите на вториот тим на Еурофарм Пелистер својот дебитантски настап во европските купови го заврши со два порази.

Младите ракометари во првото квалификациско коло за пласман во групната фаза во Лигата на Европа се елиминирани од австрискиот тим Алпла Хард кој по трумфот од 21:24 во првиот натпревар, вечерва во Битола славеше со 24:27.

Битолчани одлично го започнаа натпреварот и поведоа со 3:0, но трите технички грешки во нападот беа казнети со три гола од страна на противникот и израмнување на 3:3.

Потоа следеа минути во кои се играше гол за гол, а првото водство за австрискиот тим беше 7:8. Во финишот на првиот дел, Алпла Хард со серија од четири гола поведе со 11:14, но на пауза се замина од минус два за Е. Пелистер по голот на Белистојановски.

Во вториот дел избраниците на тренерот Александар Јовиќ постојано ја бркаа предноста на противникот, но не успеаја во ниту еден момент да израмнат. Дилемите околу победниот беа решени со серијата од 0:4 на противникот кој од 17:18 отиде на плус пет (17:22).

Најдобар стрелец кај вториот тим на Еурофарм Пелистер беше Ненад Белистојаноски со шест гола, Петар Атанасијевиќ даде четири, додека во редовите на Алпла Хард, Иван Хорват даде седум гола.