Еден од лидерите на Вреди, Биљал Касами, во интервју за „360 степени“, на прашањето зошто довчерашната коалиција, а сега партија има двајца копретседатели, рече дека Албанците, особено во Македонија, досега страдале од узурпација на позицијата претседател на партијата.

Според Касами, тоа било случај во неколку партии, што предизвикувало поделби.

„Носени од ваквата реална ситуација, ние веќе се соединивме првично како една коалиција за да работиме долго време, околу две години, и да видиме кој е најдобриот модел за да бидеме заедно, а да се намали опасноста од поделби после тоа. И ова се најде како најдобар пример и модел. Значи, не е само принципот на двајца претседатели, туку генерално – наместо еден претседател, лидер, неприкосновен, кој ги носи одлуките во сите други политички партии, овде имаме претседателство, овде имаме едно колективно тело каде што генерално одлуките ќе се носат помеѓу тие пет членови на тоа тесно претседателство на Влен“, рече Касами.

Петте партии од коалицијата Вреди се споија во еден политички субјект на конгрес во саботата во Скопје. Беше одлучено новата партија да има двајца копретседатели – Изет Меџити и Биљал Касами, како и двајца потпретседатели, Мимоза Муса и Беким Ќоку. Генерален секретар на партијата е Беким Сали. Овие петмина го сочинуваат Претседателството што одлуките ќе ги носи со 80-процентно мнозинство.

Членовите на Претседателството на Вреди се практично претставници на секоја од петте партии што се обединија. На прашањето дали ова е, практично, формализирање на поделбата, Касами негираше. Тој ги оцени своите лични односи со другиот копретседател на Вреди, Изет Меџити, како „прекоректни“ и рече дека имаат доверба еден во друг.

Власта без консензус ќе го турка и Изборниот законик?