Одлуката на НАТО, донесена под притисок на американскиот претседател Доналд Трамп, членовите да издвојуваат 3,5 проценти од својот БДП за одбрана во иднина, започна нов инвестициски бран. Особено во клучните европски земји – Германија, Франција, Италија, Шпанија и Велика Британија – потребата за нови воени области расте. Огромните инвестиции во воената индустрија и одбраната на Европа, исто така, имаат неочекувани последици: стимулираа силен раст на цените на недвижностите погодни за воени потреби, а претходно неинтересните локации сега стануваат привлечни за инвеститорите.

Во Германија, која станува центар на новата европска одбранбена инфраструктура, побарувачката за простор за магацини, производствени погони, бази за ремонт и логистички центри е зголемена, а побарувачката далеку ја надминува понудата. Според проценките на аналитичарите, цените на недвижностите што ги исполнуваат строгите безбедносни барања за нови воени објекти на локалниот пазар се зголемија за 15 до 30 проценти.

„Веќе гледаме значително зголемување на цените на парцелите и зградите што ги исполнуваат високите безбедносни стандарди“, изјави за Ханделсблат, Роберто Крапанцано од консултантската куќа ЏЛЛ Ворк Дајнамикс.

Ваквите простори мора да бидат надвор од големите урбани средини, но сепак добро поврзани со транспортната инфраструктура. Според анализата на Савилс, само на европските членки на НАТО ќе им бидат потребни дополнителни 37 милиони квадратни метри за логистика во наредните години, од кои шест милиони во Германија – зголемување од 17 проценти во споредба со постојните капацитети. Во Германија, во третиот квартал, прометот на пазарот на логистички недвижности веќе порасна за десет проценти, при што сегментот за одбрана и безбедност бележи најбрз раст, а се очекува овој тренд да се интензивира во 2026 година, пренесува тпортал.хр.