Вонбрачната ќерка на поранешниот белгиски крал Алберт Втори, уметницата Делфин Буел (52), на суд во Брисел ги бара истите права и титули како оние што ги имаат законски признаените деца на нејзиниот татко.

Адвокатот на поранешниот белгиски крал истакна дека Делфин може да ја добие посакуваната титула на принцеза исклучиво со кралски декрет, а не како што таа посакува, со судска одлука.

Долго време негираше дека има четврто дете

Поранешниот белгиски крал Алберт Втори долги години го негираше постоењето на својата вонбрачна ќерка. Сепак, ваквото негово тврдење беше отфрлено откако на почетокот на оваа година, со ДНК-анализа, беше потврдено дека тој и Делфин се татко и ќерка и дека тој е нејзин биолошки родител.

Мајката на Делфин, бароницата Сибиле де Солис Лонгшамп, тврди дека била во врска со Алберт околу 18 години, пред тој да биде прогласен за крал.

Обидите да се постигне целта траат од 2013 година

Гласините околу тоа дека Алберт Втори има вонбрачно дете кое одбива да го признае, првпат во јавноста беа пласирани во 1999 година, во неавторизираната биографија на неговата сопруга Паола Руфо ди Калабрија.

Делфин Буел, пак, првпат јавно проговорила за своето крвно сродство со кралот во 2005 година за време на едно интервју. Но, таа не ги бараше своите права на суд сѐ до 2013 година, односно сѐ до мигот кога нејзиниот татко не се повлече од функцијата во корист на синот Филип. До тој миг, Алберт имаше имунитет и не беше во можност судски да се гони.

Казна од 5.000 евра

Кога конечно Делфин побарала властите да ѝ помогнат за да докаже дека е ќерка на Алберт, било наложено да се земе крв од двете страни и со помош на ДНК-анализа да се утврди крвното сродство. Но, дотогашниот крал одбивал секаков вид соработка, за што бил казнет со 5.000 евра.
Конечно во јануари годинава, 86-годишниот Алберт изјавил дека ја признава Делфин за своја ќерка, односно дека ја прифаќа за свое четврто биолошко дете.

Љубовната афера му била позната на белгиското општество долги години, но не било јасно дали таа е вистинита. Со соопштение е потврдено дека од 1967 до 1984 година, Алберт Втори, кој бил принц на Лиеж, имал омажена љубовница, со која во 1968 година добил дете. Документи докажуваат дека во истиот период тој подготвувал развод со неговата сопруга Фабиола.

Алберт Втори постојано ја посетувал својата вонбрачна ќерка сѐ до неговата 25-годишнина од бракот, кога ѝ ветил на сопругата дека ќе се раздели од љубовницата и десетгодишното дете, со што си го спасил.

Од 2001 година кралот ја прекинал врската со ќерката Делфин, која во 2013 година поднесе судска постапка за докажување на татковство.