Русија се соочува со сѐ подлабока криза во состојбата на својата морнарица, а истакнати воени аналитичари јавно признаа дека флотата не е способна да ги брани танкерите за нафта поврзани со Русија од пресретнување од странски сили, објави „Дифенс блог“.

Проценката, изнесена од руски аналитичари и засилена преку воениот канал „Војениј Осведомител“, доаѓа во време кога американските сили продолжуваат да запленуваат санкционирани бродови ширум светот.

Во последните денови, руски коментатори, блиски до одбранбениот естаблишмент, признаа дека Москва нема доволен број бродови, дострел и логистички капацитет за спроведување мисии за придружба или заштита на далечни поморски маршрути. Нивните изјави следуваа по запленувањето на танкерот за сурова нафта „Маринера“, кој пловеше под руско знаме, во Северниот Атлантик – и тоа и покрај присуството на бродови на руската морнарица и подморница во поширокиот регион.

Според „Војениј Осведомител“, идејата дека Русија би можела „да се нафрли врз американски бродови“ за да спречи запленување танкери е нереална. Каналот наведува дека руската морнарица „едноставно не поседува такви капацитети“, потсетувајќи дека долго најавуваните програми за модернизација се заглавени, а преостанатите бродови од советската ера стареат без соодветни надградби.

Друг руски аналитички извор, цитиран од про-Кремљ медиуми, понуди детална анализа на слабостите на флотата. Аналитичарот посочува дека Русија планирала до 2020 година да воведе 44 до 50 нови корвети и фрегати, врз основа на програми од почетокот на 2000-те. Наместо тоа, морнарицата добила само 16 бродови, од кои 10 се корвети чија способност „активно да дејствуваат во Северниот Атлантик во зимски услови е сомнителна“.

Од преостанатите шест бродови, два моментално се заробени во Црното Море, каде што се блокирани поради војната во Украина и поради ограничувањата што Турција ги воведе согласно Конвенцијата од Монтре.

ВИДЕО: Америка го заплени танкерот кој пловеше под руско знаме – дали Трамп зачекорува на опасен терен?

Модернизирани се само два брода

Истиот извор додава дека Русија имала намера да модернизира околу 20 големи противподморнички бродови, разорувачи и крстосувачи наследени од Советскиот Сојуз. До денес, значајни модернизации поминале само за два брода – крстосувачот „Маршал Устинов“ и фрегатата „Маршал Шапошников“.

Другите бродови од советско производство технички сѐ уште можат да пловат, но, според аналитичарите, повеќе не се способни за долготрајни операции далеку од домашните води. Преостанатите бродови од првиот и од вториот ранг се доволни за одржување присуство во Балтичкото и во Баренцовото Море, но не и за обезбедување 24-часовна заштита илјадници километри од руските бази.

Проценката ја истакнува јазот меѓу долгогодишните амбиции на Русија за „океанска“ морнарица и реалната состојба на нејзиниот бродски состав.

„Дури и ако проблемот со физичкото присуство биде решен“, пишува аналитичарот, „останува сериозна ранливост во правната сфера“, со оглед на тоа што САД можат да издаваат налози за апсење на екипажите на танкерите. Секој цивилен морнар, што би учествувал во мисии за придружба ризикува притвор, а Русија „не може да обезбеди заштита“ за странските државјани ангажирани на такви бродови.

ВИДЕО: Америка го заплени танкерот кој пловеше под руско знаме – дали Трамп зачекорува на опасен терен?

Адмирал Моисеев: Русија бара засолништа надвор од својата економска зона

Анализата се повикува и на текст од декември 2025 година, објавен од врховниот командант на руската морнарица, адмирал Александар Моисеев, во списанието „Воена мисла“. Во трудот, Моисеев ги наведува мерките што морнарицата треба да ги преземе за заштита на трговскиот сообраќај, но признава дека операциите надвор од ексклузивната економска зона на Русија главно се сведуваат на рано повлекување на бродовите од опасност, реагирање по странски задржувања и на барање засолниште во пристаништа на пријателски или неутрални држави.

Аналитичарот забележува дека во текстот се нагласува потребата од сеопфатен систем за одбрана од дронови, но не се обработува способноста на Русија да одговори на поморска блокада или да обезбедува придружба на бродови во оддалечени региони. Заклучокот, кој широко одекна во руските одбранбени кругови, е дека „не постојат ниту лесни ниту брзи решенија“.

Дебатата се отвора во момент на зголемен притисок врз поморската логистика на Русија. Земјата веќе го загуби најголемиот дел од борбените капацитети на Црноморската флота поради украински напади, додека, пак, Касписката флотила беше изложена на повеќекратни напади со беспилотни летала со долг дострел. Во меѓувреме, руското поморско присуство во Средоземјето е ослабено поради падот на пријателски режими и ограничувањата што Турција ги воведе за движењето на руските воени бродови.

Како што наведува „Војениј Осведомител“, распадот на кредибилитетот на океанската флота ја остава Русија со „само хартиени капацитети“.

Според аналитичарите, неспособноста на морнарицата да ги заштити танкерите е јасен показател за кумулативните последици од неуспесите во бродоградбата, санкциите и во загубите претрпени од почетокот на инвазијата врз Украина во 2022 година.

Москва ја редефинира стратегијата на Црното Море: најавен нов модел на војување