САД соопштија во средата дека заплениле танкер кој пловел под руско знаме, поврзан со Венецуела, како дел од агресивниот пристап на претседателот Доналд Трамп за диктирање на нафтените текови во Америка и за принудување на социјалистичката влада во Каракас да стане сојузник на Вашингтон, објави „Ројтерс“.

Американската крајбрежна стража и војската го пресретнале танкерот „Маринера“, кој минатиот месец одбил да биде качен на инспекција и потоа го сменил знамето во руско, соопштија официјални извори запознаени со приликите.

Со руската подморница и други пловила во близина, по двонеделна потера во Атлантикот, овој потег носи ризик од дополнителна конфронтација со Москва, која ги осуди американските активности околу Венецуела и веќе е во конфликт со Западот поради војната во Украина.

Руската државна телевизија РТ прикажа фотографија од хеликоптер што лебди над „Маринера“, порано познат како „Бела-1“, наведувајќи дека изгледа оти американските сили се обидуваат да се качат на санкционираниот танкер, кој во моментот е празен.

Американската крајбрежна стража пресретнала и уште еден целосно натоварен танкер поврзан со Венецуела – „Софија“, во близина на североисточниот брег на Јужна Америка, со што ова е четврти ваков случај во последните недели, соопштија официјални извори.

Секретарката за национална безбедност на САД, Кристи Ноем, на „Икс“ објави видео од акцијата во која беше запленет танкерот.

In two predawn operations today, the Coast Guard conducted back-to-back meticulously coordinated boarding of two “ghost fleet” tanker ships— one in the North Atlantic Sea and one in international waters near the Caribbean. Both vessels —the Motor Tanker Bella I and the Motor… pic.twitter.com/cFuNDtYR8n

— Kristi Noem (@KristiNoem) January 7, 2026

Откако го соборија венецуелскиот лидер Николас Мадуро, САД воведоа блокада на санкционирани бродови кои влегуваат и излегуваат од водите кај јужноамериканската членка на Организацијата на земји извознички на нафта (ОПЕК).

Трамп отворено зборува за преземање и за управување со венецуелската нафта, вклучително и планот САД да рафинираат и продаваат до 50 милиони барели сурова нафта заглавени поради санкциите, со средствата под негова директна контрола.

Иако Николас Мадуро е уапсен и се соочува со судење во САД, неговите политички сојузници сè уште ја држат власта во Венецуела, а привремената претседателка Делси Родригез се обидува да балансира меѓу јавната осуда на американската акција и практичната соработка под закана од дополнителен притисок.

Апсењето на Мадуро, изведено со американски специјални сили, предизвика силни реакции кај Русија, Кина и кај левичарските сојузници на Каракас, кои го оценија како опасен преседан и како најголема американска интервенција во Латинска Америка од 1989 година.

И покрај загриженоста и кај некои американски сојузници, Трамп сигнализира дека приоритет му е стабилизација и рестарт на нафтениот сектор со помош на американски компании, додека венецуелската опозиција, предводена од Марија Корина Мачадо, останува во исчекување на политички расплет.

Си-ен-ен: Како Рубио го испланира киднапирањето на Мадуро