ВО ЖИВО | Министерски совет на ОБСЕ во Скопје
Северна Македонија и главниот град Скопје се домаќини на 30. Министерски совет на Организацијата за безбедност и соработка во Европа – ОБСЕ, на кој учествуваат околу 1000 делегати од 57 земји членки на Организацијата и земји партнери.
На најголемиот меѓународно-политички настан организиран во земјава од независноста присуствуваат шефовите на дипломатиите на најголем број од земјите-учеснички на ОБСЕ – САД, Канада, Велика Британија, министри од земјите-членки на ЕУ и на НАТО, од Медитеранот, Блискиот Исток и Централна Азија.
Министерскиот состанок кој што се оджува во Спортскиот центар „Борис Трајковски“ официјално ќе го отворат претседателот на Владата на Северна Македонија, Димитар Ковачевски, претседавачот со ОБСЕ, министерот Бујар Османи и претседателот на Парламентарното собрание на ОБСЕ, Пиа Каума. На отворениот дел од пленарната седница Извештај ќе поднесе генералниот секретар на ОБСЕ, Хелга Марија Шмид.
Најновите настани и изјави следете ги во продолжение:
Самит на ОБСЕ во Скопје
Завршни зборови, следува вечера
ВИДЕО: Земјите од регионот во заедничка битка против корупцијата
Во рамки на Министерскиот состанок на ОБСЕ во Скопје денеска министрите за надворешни работи на Македонија, Албанија, Босна и Херцеговина, Србија и Црна Гора потпишаа заедничка изјава за борба против корупција, перење пари и олеснување на напорите за враќање на имотот.
Сијарто по средбата со Лавров: Унгарија ќе соработува со Русија како и досега
Нашата надворешна политика се води врз основа на националниот интерес и не прифаќаме никаков надворешен притисок, напиша унгарскиот министер за надворешни работи Петар Сијарто по билатералната средба со рускиот колега Сергеј Лавров на маргините на самитот на ОБСЕ во Скопје.
Русија не е заинтересирана за мир во нашиот регион, вели ерменскиот министер за надворешни работи
Во своето обраќање, министерот за надворешни работи на Ерменија, Арарат Мирзојан изјави дека неговата земја е спремна да даде се од себе за да се добие траен мир во Нагорно-Карабах. Тој ја обвини Русија дека не сака да има мир во овој регион, употребувајќи ја својата моќ за да го продолжува ќор-сокакот во ова прашање.
Дачиќ од Министерскиот состанок на ОБСЕ: Да не ни се држат лекции од страна
Замолувам да не ни се држат лекции од страна, бидејќи сите земји членки на Европската Унија сега да треба да поминат низ она што поминуваме сите ние тука за да влеземе во Унијата, тогаш три четвртини од земјите не би го поминале тестот, порача српскиот министер за надворешни работи Ивица Дачиќ.
Естонска дипломатка прашува: Како може држава која ги прекршува сите принципи, да гласа кој ќе биде претседавач на ОБСЕ?
Министрите за надворешни работи на Естонија, Литванија и Летонија во заедничка изјава во вторникот соопштија зошто нема да учествуваат на Самитот на ОБСЕ во Скопје.
„Концесиите кон агресорот само зголемуваат апетитите на агресорот. Поддржуваме продолжување на мандатите за четирите клучни позиции во ОБСЕ за уште една година“ изјави естонската дипломатка.
Таа ја осуди руската агресија, тврдејќи дека Русија ги прекршила сите принципи, па праша како може таква земја да диктира кој ќе биде претседавач на ОБСЕ.
Грција и посака среќа на Малта во претседавањето
Грчкиот амбасадор во ОБСЕ Константинос Колиас изјави дека неговата земја од самиот старт ја поддржа независноста на Украина, и ќе продолжи со тоа.
Словенија сака да го види крај на сите конфликти во светот
Со мало задоцнување, словенечката министерка за надворешни работи, Тања Фајон изјави дека убиството на невини цивили не смее да остане неказнето. Таа додаде дека Словенија ќе продолжи да ја поддржува Украина и дека сака што е можно да донесе мир во Украина, Газа, Нагорно-Карабах, како и секаде каде има немири во светот.
Територијалниот интегритет е важен за секоја земја, вели Дачиќ
Српскиот министер за надворешни работи, Ивица Дачиќ изјави дека секоја земја во светот го заслужува својот територијален интегритет.
Бербок: Нема да дозволиме играта на Русија да ги уништи организациите кои се потпираат на мирен соживот и соработка
Германската министерка за надворешни работи Аналена Бербок на денешниот Министерски состанок на ОБСЕ во Скопје порача дека Организацијата мора дополнително да ја зајакне соработката, иако Русија прави огромни пречки на патот на работата во последните година и половина. Бербок додаде дека нема да дозволат играта на Русија да ги уништи организациите кои се потпираат на мирен соживот и соработка.
Еден против сите, сите против Лавров
Добро е што се одржува Министерскиот совет на ОБСЕ во Скопје и наjверојатно ќе бидат донесени сите потребни одлуки за да се обезбеди иднината на Организацијата, но не се знае колку време ќе траат одлуките, оценија дипломатите со кои разговараше „Слободен печат“ за време на 30. Самит што се одржува во СРЦ „Борис Трајковски“.
Бугарија и натаму ја поддржува Украина
Бугарската делегација се заблагодари за гостопримството во Скопје и и посака среќа на Малта во следната година. Бугарската делегација соопшти дека земјата останува цврсто да ја поддржува Украина во нејзините напори да се справи со руската офанзива.
Лавров од Скопје порача дека поделбите на континентот ја поткопуваат безбедноста што ја креира ОБСЕ
Министерот за надворешни работи на Русија Сергеј Лавров денеска се обрати на 30. Министерски состанок на ОБСЕ, што се одржува во Скопје. Лавров порача дека тоа што во моментов се случува во Организацијата не е вистинскиот начин на кој треба да се третираат европските бебедносни прашања. Веднаш по завршување на долгиот говор, шефот на руската дипломатија ја напушти салата во која се одржува состанокот.
Бербок: Не смее да се дозволи Русија да ја попречува работата на ОБСЕ
Соработката во Организацијата за безбедност и соработка во Европа (ОБСЕ) мора дополнително да се зајакне иако Русија постави огромни пречки на патот на работата на ОБСЕ во последните година и пол, порача германската министерка за надворешни работи Аналена Бербок во своето обраќање на 30. Министерски состанок на ОБСЕ во Скопје.
Бербок, исто така, порача дека нема да ја дозволат играта на Русија да ги уништи организациите кои се потпираат на мирен соживот и соработка.
- Како ниедна друга организација, ОБСЕ се залага за безбедност на повеќе од 1,3 милијарди луѓе, што значи дека тие сакаат да живеат заедно во мир и безбедност и добар економски развој, нагласи Бербок.
Фактот дека Русија не успеа да го уништи ОБСЕ „е важен придонес за нашиот мировен поредок“, рече шефицата на германската дипломатија, нагласувајќи дека „овој поредок на мир мора да продолжи“.
Заедничка изјава за борба против корупција
Обраќање на министерот за надворешни работи на Малта
Министерот за надворешни работи на Малта, Иан Борг изјави дека со нетрпение очекува следната година неговата земја да го преземе претседавањето со ОБСЕ.
Тој ја повика Русија да се повлече од украинска територија, тврдејќи дека Малта се залага за мир во светот.
ВИДЕО | Ана Воронина, новинарка во Русија 24: ОБСЕ е добра платформа за дијалог, проблемот треба да го решиме заедно
На Самитот на ОБСЕ во Скопје, разговаравме со Ана Воронина, новинарка од рускиот телевизиски канал Русија 24 која пристигна заедно со руската делегација на чело со министерот за надворешни на Руската Федерација Сергеј Лавров.
Сесијата продолжува
Министрите се вратија во салата, сесијата продолжува
Пауза до 15 часот
Откако својата изјава ја даде турскиот министер за надворешни работи, министерот Османи најави пауза до 15 часот, а потоа следува вториот дел од пленарната сесија.
Шаленберг со пофални зборови за македонското претседавање
Австрискиот министер за надворешни работи Александар Шаленберг го пофали начинот на кој Северна Македонија изминатава година претседаваше со ОБСЕ. Предизвиците со кои се соочи ОБСЕ, според него, се дополнителни пречки со кои се соочи ОБСЕ. Шаленберг ги повика неговите колеги да ја покажат истата поддршка како нивните поранешни колеги пред 50 години.
ОБСЕ го „забави“ Скопје: Полни паркинзи, празни улици, затворени дуќани, градот не вирее без адиминистративците
Дел од дуќанџиите во трговските центри воопшто не беа отворени, за да не прават непотребни трошоци за минимален трошок. Од друга страна слободен термин немаше во фризерските и козметичките салони, стоматолошките ординации, а големи редици се забележани пред пунктот за сликање за пасош и лична карта
ВИДЕО | Пристигнувањето на дипломатите во Скопје
Дипломатите утрово околу 9 часот почнаа да пристигнуваат во СЦ „Борис Трајковски“, каде во моментов министрите и дипломатите ги даваат своите изјави.
ОБСЕ не згреши што претседавањето од Тирана го префрли во Скопје
Албанскиот министер за надворешни работи Игли Хасани го поздрави доброто претседавање со ОБСЕ на министерот Османи и изјави дека тие не згрешиле што од Тирана претседавањето се префрли во Скопје. Тој изјави дека Албанија напорно работи за задржување на мирот на Западен Балкан и покрај настаните кои во последните месеци се случуваат на Косово. Според него, дијалогот е единствен начин да се дојде до решение за прашањето меѓу Србија и Косово.
Лавров ја напушти салата
Лавров по крајот на неговиот говор ја напушти салата.
Следен говорник е данскиот министер за надворешни работи.
Лавров ги обвини западните сојузници за немирите во светот
Рускиот министер за надворешни работи Сергеј Лавров укажа на потребата од ОБСЕ да продолжи со својата работа за задржување на безбедноста. За жал, западните елити не направија чекор кон ОБСЕ, туку кон НАТО. Сето ова започна со проширувањето на НАТО кон руско соседство. Лавров ги наброја сите претходни војни интервенции на НАТО, без согласност на меѓународните заедници.
Сијарто: Унгарците гинат во Украина
Министерот за надворешни работи на Унгарија, Петер Сијарто изјави дека неговата земја не сака да види луѓе како гинат во војната во нивно соседство. Мирот е единствен начин за да се стави крај на војната и да се спречи понатамошно уништување. Не ни треба повеќе оружје во овој регион, ни треба мир, вели тој. Сијарто го пофали Османи за неговите напори да се задржи шансата за мир.
Канада и Ирска ја поздравија одлуката на Малта
Претставниците на канадските и на ирските делегации ја поздрави работата на Северна Македонија со претседавањето на ОБСЕ, како и одлуката на Малта да го преземе претседавањето.
Османи: Се надевам дека ќе обезбедиме предвидлива и конструктивна иднина за ОБСЕ
Северна Македонија го презеде претседавањето со ОБСЕ во година на активна војна со досега невидени закани по европската безбедност и по меѓународниот поредок базиран на правила. Руската воена агресија врз Украина ги прекрши сите правила на Организацијата, Финалниот акт од Хелсинки и други клучни документи за европската сигурност и човековите права. Војната ги поткопа довербата, дијалогот и нашиот капацитет да испорачаме, а над се таа ги уништи животите на обичните луѓе, нивното право да живеат слободно, соочени со стравот од војната и создадените воени услови, порача министерот за надворешни работи и претседавач со ОБСЕ, Бујар Османи на отворањето на 30. Министерски состанок на ОБСЕ во Скопје.
Децата се најголеми жртви во Украина, велат француските делегати
Француските делегати велат дека украинските деца се најголемите жртви на војната во Украина. Тие ја потенцираа потребата за мир и во Нагорно-Карабах, и ја потврдија француската поддршка во ставање мир во овие области.
Министерот за надворешни работи на Луксембург до руската делегација: Престанете!
Поранешниот премиер на Луксембург и актуелен министер за надворешни работи, Ксавиер Бетел искрено и отворено упати апел до Русија да ја престане војната.
„Имав добри односи со Владимир Путин, а неколку пати разговарав и со Володимир Зеленски. На сојузниците не им се допаѓаше што се обидував да разговарам и со двете страни. Имам руско потекло, мојата мајка е од Русија, а јас имам сопруг, така што не би ни можел да влезам во некои делови од Русија. После Буча мислам дека немаше поента за преговори“ изјави тој.
На Путин му кажав дека Сирија, Еритреја и Северна Кореја му се најголеми сојузници, додава тој.
„Запрете го тоа што е неприфатливо“ им кажа тој на руските делегати.
Само Русија може да ја запре војната, вели холандската министерка за надворешни работи
Холандија ќе продолжи да ја поддржува Украина, со нов пакет помош.
Русија е единствена која може да ја сопре војната.
Холандија ја осудува политиката на Русија да транспортира украински деца на нејзина територија, ова се зборовите на холандската министерка за надворешни работи Ханке Бруинс Слот
Делегатите од САД и од Британија со заеднички повик до Русија да ја прекине агресијата
Британските и американските дипломати кои говореа еден по друг, ја потенцираа потребата да се стави крај на руската агресија над Украина.
Британскиот министер за надворешни работи, Дејвид Камерон синоќа по средбата со министерот Османи ја напушти земјата, додека пак шефот на американската дипломатија Ентони Блинкен замина во официјална посета на Израел.
Бербок ги предупреди земјите од Западен Балкан за руското влијание
Германската министерка за надворешни работи Аналена Бербок изјави дека Берлин продолжува со поддршката за земјите од Западен Балкан во нивните напори да се приклучат кон ЕУ, како и за Украина која продолжува да се бори со руската агресија.
Шведска го дели ставот со Финска: Мора да се спречи ширењето на руската пропаганда
Шведскиот министер за надворешни работи Тобијас Билстром како и неговата финска колешка, упати критики кон руската инвазија врз Украина.
Тој предупреди дека земјите како Молдавија и балканските држави мора да се задржат настрана од руската пропаганда.
Финската министерка со остри критики кон руската агресија врз Украина
Финската министерка за надворешни работи, Елина Валтонен со остри критики кон руската агресија врз Украина го започна својот говор.
Финска неодамна одлучи да затвори голем дел од своите граници со соседна Русија.
Шпанија ја поддржува Малта во нејзиното преземање
Шпанскиот министер за надворешни работи, Хозе Мануел Албарес изјави дека земјата ја поддржува одлуката Малта да биде следен претседавач со мисијата на ОБСЕ.
Претставничката од ЕУ изјави дека блокот мора да биде обединет во овие тешки времиња.
Обраќање на министрите и дипломатите
По кратката пауза министерот Османи ја продолжи агендата, а прв говореше министерот за надворешни работи на Узбекистан, Бахтијор Саидов.
Крај на првиот дел од агендата, кратка пауза
Министерот Османи им се заблагодари на соговорниците и најави кратка пауза по крајот на првиот дел од агендата.
„Слободен печат“ во живо од Самитот на ОБСЕ!
Екипата на „Слободен печат“ е присутна уште од почетокот на Самитот на ОБСЕ во Скопје во СЦ „Борис Трајковски“.
Нашиот новинар Борјан Бојчев за утринската програма на „Слободен печат“ ја опиша атмосферата на настанот.
Обраќање на генералната секретарка на ОБСЕ, Хелга Марија Шмид
По госпоѓата Каума, министерот Османи ја претстави генералната секретарка на ОБСЕ, Хелга Марија Шмид.
Таа говори за предизвиците со кои се соочиле во изминативе неколку години, како немирите на талибанците во Авганистан, војната во Украина, како и нападите во Газа.
Обраќање на Претседателката на Парламентарното собрание на ОБСЕ, Пиа Каума
Министерот Османи и ја отстапи сцената на Претседателката на Парламентарното собрание на ОБСЕ, Пиа Каума.
Таа ја потенцираше поддршката потребна за Украина која војува против руската агресија.
Обраќање на министерот Османи
Во моментов министерот за надворешни работи на Република Северна Македонија и домаќин на Самитот на ОБСЕ, Бујар Османи се обраќа на почетокот на официјалната средба
Премиерот Димитар Ковачевски со воведно обраќање го отвори 30. Министерски состанок на ОБСЕ
Пристигна Сергеј Лавров
Пристигна и рускиот министер за надворешни работи, Сергеј Лавров, кој исто така не даде изјава за медиумите
Пристигна шефицата на германската дипломатија Аналена Бербок
Пред малку пристигна и германската министерка за надворешни работи, Аналена Бербок, но не даде изјава за медиумите.
Израелскиот министер Ели Кохен: Мора да го уништиме Хамас
Само што пристигна и израелскиот министер за надворешни Ели Кохен, кој за новинарите изјави дека неговата земја поминува тешко време и дека тие „мора да го уништат Хамас“
Пристигна српскиот министер за надворешни работи Ивица Дачиќ
Српскиот министер за надворешни работи Ивица Дачиќ само што пристигна на настанот, пречекан од неговиот колега Бујар Османи
Пристигнуваат бројни министри, се очекува и Лавров
Неколку министри за надворешни работи пристигнаа на настанот, пречекани од македонскиот шеф на дипломатијата, Бујар Османи.
Се уште се очекува да пристигне рускиот министер за надворешни работи Сергеј Лавров
Во 10 часот започнува пленарната сесија
Додека дипломатите пристигнуваат, во 10 часот се очекува да се одржи почетната пленарна сесија каде се очекува прво обраќање на претставниците од македонското МНР
Утрово без преголем метеж на улиците
Од тоа што можевме да го забележиме додека пристигнувавме до СЦ „Борис Трајковски“ утрово низ улиците на главниот град немаше преголем метеж на улиците, а сообраќајот се одвиваше без поголеми проблеми.
Делегациите пристигнуваат
Министерот за надворешни работи Бујар Османи ги пречекува странските дипломати кои пристигнаа на Самитот на ОБСЕ
Почитуван читателу,
Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.ПОДДРЖЕТЕ ГО СЛОБОДЕН ПЕЧАТ. СО ПОЧЕТНА СУМА ОД 100 ДЕНАРИ
Видео на денот