Најголем проблем на организаторот на ИКАС 2023 (8-9 април) е обивањето на објектот на Кајакарската федерација на Македонија, што се случило во три наврати минатата недела, во понеделникот, во средата и во четвртокот, при што е направена материјална штета од околку 1.500 евра.

Објектот е лоциран кај стартот на кајакарската патека на Матка крај Скопје. Украдни се агрегат за струја и разна друга опрема, скали за на патека, табли, телевизор и друга опрема и алатки.

– Вкупната штета грубо е околу 1.200 до 1.500 евра. Сега се плашиме да ги оставиме и чамците горе. Низ годините без проблем сме ги оставале чамците, а сега тоа го правиме со страв. Чамците на гостите-натпреварувачи се наша одговорност. За среќа досега чамци не се украден. Со полицијата имаме добра соработка во истрагата околку обивањата – вели Коста Евтимов, секретар на федерацијата, којшто ни ја даде информацијата за обивањето и грабежот.

Според него објектот ќе треба да се обезбеди со приватно обезбедување, затоа што гостите на ИКАС ќе очекуваат нивните чамци и опрема да бидат сигурни.

Првпат се случува да биде на ваков начин обиен објектот, кој е таму долги години. Сега трипати се обива и ограбува во рок од пет дена.

– Тоа ни е најголем проблем во организацијата годинава. Сега мораме да ги корстиме средствата за да ја обновиме опремата, наместо да ги трошиме за други работи при организацијата – вели Евтимов.

ИКАС 2023, еден од трите најстари кајакарски натпревари во светот, претстојниот викенд ќе се одржи по 54. пат со учество на кајакари од десетина земји.