Вкусни приказни со Кристина Колевски: Рецепт за супа со ќофтенца и просо
Во време кога сите брзаме и често готвиме „набрзина“, убаво е да се потсетиме дека подготовката на храната може да биде и вистинско уживање.
Препорачано
Токму така готви и Кристина Колевски од Битола – со вистински мерак и љубов кон целиот процес. Преку својот инстаграм-профил @solenoblagiprikazni, таа веќе подолго време ги инспирира луѓето да влезат во кујна, да си дадат време и да зготват нешто вкусно.
Денеска таа ни го претставува својот рецепт за супа со ќофтенца и просо.
Состојки за ќофтенца
- 300 гр мелено месо
- 1/2 главица кромид (рендан)
- 1 јајце
- зачини: сол, црн бибер, мешан сув зеленчук, сув босилек
Сите состојки убаво измесете ги и формирајте мали ќофтенца.
Состојки за супа
- 2-3 компири
- 3 моркови
- 1 парче пашканат
- 1/2 главица целер
- 1 говедска коцка за супа
- 1 мало филџанче (кафено) просо
- околу 2л. вода
- зачини: сол,црн бибер, мешан сув зеленчук
- магдонос
Во длабоко тенџере на оган, ставете малку масло и запржете ги ќофтенцата. Потоа додадете ги морковите, компирите, пашканатот и целерот ( претходно изрендани), кратко запржете и ставете ја водата, коцката за супа и зачинете. Оставете да се вари супата. Дваесетина минути пред крајот додадете го и просото. На крајот додадете магдонос. Готовата супа сервирајте ја во чинија, додадете сок од цеден лимон и уживајте.
На здравје!
