Вкусни приказни со Кристина Колевски: Рецепт за американска пита со јаболка
Во време кога сите брзаме и често готвиме „набрзина“, убаво е да се потсетиме дека подготовката на храната може да биде и вистинско уживање.
Препорачано
Токму така готви и Кристина Колевски од Битола – со вистински мерак и љубов кон целиот процес. Преку својот инстаграм-профил @solenoblagiprikazni, таа веќе подолго време ги инспирира луѓето да влезат во кујна, да си дадат време и да зготват нешто вкусно.
Денеска таа ни го претставува својот рецепт за американска пита со јаболка.
Состојки за тесто:
- 300 г брашно
- 225 г маргарин, исечкан на коцки
- 100 мл ладна вода
- 1 лажица шеќер
- 1 лажиче сол
Во длабок сад измешајте ги брашното, шеќерот и солта. Потоа додајте го исечканиот маргарин, замесете и постепено додавајте ја ладната вода (тестото не треба долго да се меси). Откако ќе го замесите, завиткајте го во најлонска фолија и оставете го во фрижидер 1 час. За тоа време подгответе го филот.
Фил:
- 5–6 јаболка
- 1 шолја шеќер
- 1 пудинг со вкус на ванила
- 1 лажиче сок од лимон
- 1 ќесичка ванилин шеќер
- цимет по вкус
- Друго: маргарин, јајце, кристал шеќер
Јаболката се лупат и се чистат од семките, па се рендаат. Откако ќе ги изрендате, додајте ги останатите состојки и убаво промешајте.
По 1 час, извадете го тестото од фрижидер и поделете го на два дела – поголем и помал. Од поголемиот дел развлечете кора неколку сантиметри поголема од калапот во кој ќе печете. Намачкајте го калапот со маргарин и внимателно префрлете ја кората. Со вилушка направете дупчиња и ставете го филот. Врз филот ставете неколку парчиња маргарин.
Тестото што излегува од калапот исечете го и соединете го со другиот дел од тестото, па развлечете кора и исечете кругчиња (можете да користите калапче за колачи, тапа од шише или мала чаша за ракија). Нежно распоредете ги врз питата.
Премачкајте со претходно изматено јајце и посипете со кристал шеќер. Печете во претходно загреана рерна на 200°C околу 20 минути, а потоа намалете ја температурата на 170°C и печете уште 30 минути. Откако ќе се испече, оставете ја питата убаво да се излади, па потоа сечете.
На здравје!
