Клиничката болница Аџибадем Систина по четврти пат ја доби престижната меѓународна JCI акредитација, со што повторно го потврди високиот стандард на квалитет и безбедност во здравствените услуги. Во интервју за „Слободен печат“, медицинскиот директор Емилија Мирчевска објаснува што значи ова признание и какви обврски носи за болницата.

Директорката вели дека „JCI акредитацијата претставува формален процес во кој едно независно тело проценува дали една здравствена установа ги задоволува стандардите за безбедност и квалитет во работењето. Таа посочува дека станува збор за глобално признаена акредитација присутна повеќе од 70 години, со болници од над 75 земји.

-Кога во 2016 година за прв пат го добивме златниот печат, бевме единствена болница не само во државата, туку и во регионот со вакво признание – додава таа.

На прашањето што е разликата од првата до четвртата акредитација, докторката вели дека разликата е значајна.

-Ако за првата акредитација бевме обврзани да ги исполниме основните стандарди за квалитет и безбедност, во оваа последна се очекуваше да покажеме дека размислуваме иновативно, делуваме проактивно и имаме акциони планови за кризни состојби – објаснува таа.

Таа нагласува дека новите стандарди вклучуваат и аспекти поврзани со глобалното здравје.

-Бевме исправени пред предизвик да покажеме дека ги ограничуваме штетните ефекти на глобалното затоплување, го фаворизираме процесот на декарбонизација и внимаваме на селекција на отпад и емисии на штетни гасови – вели Мирчевска.

За тоа како се добива акредитацијата, докторката вели дека процесот е долг и комплексен и се повторува на секои три години.

-Во периодот меѓу две акредитации мора да покажеме континуитет во работењето, особено во пациент-фокусираната грижа, безбедноста на објектот, управувањето со лекови и почитувањето на интернационалните стандарди – вели Мирчевска.

Посебен акцент вели дека се става и на медицинскиот кадар.

-Обврзани сме да правиме континуирана евалуација на перформансите на вработените, да ги следиме нивните клинички компетенции и постојано да ја верифицираме нивната едукација – вели Мирчевска.

Акредитацијата ја врши меѓународен тим експерти.

-Станува збор за сертифицирани, независни членови – обично тројца: лекар, медицинска сестра и технички експерт – појаснува директорката.

Контролата вклучува директно следење на пациентите.

-Се следи патеката на пациентот – од влез во болницата, преку дијагностика и третман, до излегување или рехабилитација – вели таа.

За пациентите, според неа, најголемата придобивка е сигурноста.

Акредитацијата е потврда дека пациентите добиваат услуга на ниво на најреномираните светски здравствени центри. Златниот печат значи највисоко ниво на безбедност и квалитет во лекувањето – вели Мирчевска.

На прашањето што следува до следната акредитација, докторката вели дека новина е што болницата ќе биде под континуиран надзор.

-На секои шест месеци ќе имаме проверки – таканаречени ‘point of touch’ контроли, каде ќе се анализираат нашите процеси и напредокот по дадените препораки – објаснува Мирчевска.

Очекувањата за следниот циклус се уште повисоки.

-Петтата акредитација треба да нè донесе на повисоко ниво, со подетална анализа на ризиците и проактивно делување во заштита на пациентите и вработените – вели таа.