Новинарката Теодора Цветковска „побегна“ од традиционалниот медиум, телевизијата и одлучи да се насочи кон создавање поткаст. Моментално најактуелниот медиум за изразување и една од најчестите алатки за информирање на бројна публика. Популарноста за создавање на поткасти е меѓународно присутна, но и Македонија не е заобиколена од овој тренд.

Цветковска се потпишува како автор на поткастот „Анекта“ и како основач на првиот агрегатор за македонски поткасти.

Таа одлучила да се занимава со поткаст бидејќи била незадоволна од тоа како биле третирани темите за кои таа работела на вести.

– Моите теми беа на маргините, на крајот од вестите во максимум 2-3 минути, мене тоа не ми се допаѓаше, сметав дека луѓето кои јас ги снимам тие приказни заслужуваат поголемо внимание. Приматот кој им се дава на политичарите според мене е погрешен, постојат многу поважни луѓе чија судбина треба да се чуе. Затоа се одлучив да направам поткаст каде што јас ќе бидам уредник и каде јас ќе одлучувам кој и колку ќе трае – вели Цветковска за „Слободен печат“.

Според Цветковска негативните коментари за тоа што „поткастите никнуваат како печурки“ и за тоа дека „секој на кој му текна направи поткаст“ се сосема разбирливи.

– Јас тоа го споредувам со напливот на портали, ако ви текнува еден период се отворија многу портали и истите коментари кружеа и тогаш дека секој на кој му текнало отворил портал, дека сите можат да бидат новинари и сл. Така беше, но со текот на времето се филтрираа работите и останаа само тие кои имаа уредувачка политика, познавање на новинарството како работа, мислам дека така ќе биде и со поткастите, со тек на време ќе се види којшто работи за што и дали може да истрае на пазарот – додава Цветковска.

ВИДЕОАНКЕТА | Ги прашавме водителите има ли предизвик во поткастот?

Нашето општество е подготвено за овој формат на медиум, луѓето сакаат да слушаат и гледаат, да се информираат преку поткасти, појаснува Цветкосвка. Според неа доброто кај поткастите е што се тематски, па така доколку некој сака да слуша за спорт го одбира тој поткаст, на македонски имаме поткасти и за здрав начин на живот, за ментално здравје, поткаст за економија, потоа поткасти кои раскажуваат инспиративни приказни на непознати луѓе, поткасти за личности од естрадата итн.

– Агрегаторот за поткасти го направивме за да може публиката на едно место да ги има сите македонски поткасти и да одбере што сака да гледа. Форматот го прилагодивме кај нас според форматот на српскиот агрегатор. Веќе имаме агрегатор за вести, па зошто да нема и за поткасти. Се надевам дека овој агрегатор ќе помогне за подобрување на македонскиот агрегатор во секоја смисла на зборот, како и за меѓусебна соработка меѓу поткастерите – вели Цветковска.

Според Цветковска на нашиот пазар недостасуваат поткасти кои ќе едуцираат.

Целото интервју погледнете го во продолжение: