На официјалното отворање на скијачката сезона на Попова Шапка која започна вчера, туристите на центарот останаа речиси 12 часа.Скијачкиот ден заврши околу 16 часот, мракот се спушти, но посетителите не можеа да се вратат дома. Патот Тетово- Попова Шапка, беше блокиран повеќе од 3 часа. Возачите со своите семејства и пријатели кои уживаа во прекрасниот сончев ден и белите падини на ски – патеките, нервозни останаа заглавени во возилата.

„Мора да има вакви како да ги наречам инциденти. Чекаме во возилото повеќе од 2 часа, тргни неколку метри па застани. Нема никаква организираност во однос на сообраќајниот режим. Сите знаевме дека денеска е официјален почеток на ски – сезоната и се знае дека тука на центарот ќе има илјадници возила и требаше полицијата да внимава кој каде паркира. Кога стигнав јас сабајле на центарот, не видов полиција по патот, па така несовесни возачи паркираа на самиот пат и затоа патот е блокиран, дополнитено и сега моментално од Тетово кон Попова Шапка одат возила и тоа дополнително го отежнува возењето. Две ленти на патот се блокирани на одредени места од паркирани возила, ние одиме надолу, некој се качува нагоре и затоа е блокиран патот, нема друго објаснување. Полицијата не требаше да ги пушта возилата да се паркираат каде ќе им текне и сега не треба да се пуштаат да одат возила кон Попова Шапка, додека ние не се симнеме надолу“, раскажа синоќа за „Слободен печат„ еден возач.

Попова Шапка нема доволно паркинг места да опслужи илјадници возила, кои за време на скијачката сезона доаѓаа во центарот, па така голем број од возачите се паркираат долж патот Тетово – Попова Шапка, но со насоки од припадници на полицијата, со цел да се избегне сообраќајниот хаос како синоќа.

Но, од СВР Тетово велат дека и вчера во пресрет на официјалното отворање на новата скијачка сезона, на Попова Шапка преземени се сите неопходни мерки и целосно бил покриен регионалниот пат Тетово-Попова Шапка со поголем број полициски службеници и возила.

„Меѓутоа, неадекватниот капацитет на коловозот за толку голем број возила (проценка од 8 до 10 илјади), дополнително стеснет од снегот лево и десно, ја намалија сообраќајната проточност на овој потег. Покрај тоа, евидентен беше и недостигот на простор за паркирање, а проблем направија и многу возила оставени на несоодветни места, нестрпливоста на возачите и недисциплинираното однесување на не мал број возачи, поради што се создаваа мешаници и бавен проток на возилата во едната и другата насока“, изјави Марјан Јосифоски, портпарол на СВР Тетово.

Вчера официјално започна скијачката сезона на Попова Шапка каде наврна речиси половина метар снег. Сончевото време и белата покривка привлече илјадници туристи.

Видеото подолу ви ја пренесува вчерашната атмосфера на скијачкиот центар Попова Шапка.