ВИДЕО: Студентски центар го совлада Партизан за прв трофеј во АБА Суперкупот
Изненадувачки црногорскиот кошаркарски клуб Студентски центар го освои АБА Суперкупот откако во Подгорица го совлада фаворитот Партизан со 83:81.
Студентски центар со победата над белградските „црно-бели“ стигна до првиот трофеј во ова натпреварување во историјата на клубот.
Во победничките редови се истакна Обри Докинс со 18 поени, четири помалку имаше Кенан Камењаш. На спротивната страна за српската екипа најефикасен беше Кевин Пантер со 23 поени, а 13 реализираше Зек Ледеј.
Во натпреварот за третото место црногорскиот Будуќност со 79:68 ја совлада босанската Игокеа. Претходно во полуфиналните дуели, Партизан беше подобар од Игокеа (91:84), а Студентски центар го надигра Будуќност (69:63).
АБА Суперкупот се одржува од 2017 година, покрај Студентски центар, по една титула имаат и Цедевита, Црвена звезда и Партизан. Во 2020 година не се организираше поради пандемијата на ковид-19.
Според најавите, новата натпреварувачка сезона во АБА лигата ќе стартува на 29 септември.