Атлетико Мадрид стигна до важна победа од 3:2 против Реал Сосиедад во натпревар исполнет со пресврти и возбудувања, во кој гостите двапати успеаја да се вратат резултатски, но на крајот сепак останаа без бодови.

Дуелот започна динамично уште во првите минути. Во петтата минута напаѓачот Александер Сорлот го донесе домаќинот во водство, но радоста на мадридскиот тим траеше кратко бидејќи само четири минути подоцна Карлос Солер погоди за израмнување на 1:1.

Во второто полувреме, поточно во 67. минута, Нико Гонзалез повторно го врати Атлетико во предност, носејќи водство од 2:1. Сепак, гостите експресно возвратија и во следната акција повторно го израмнија резултатот на 2:2.

Решавачкиот момент се случи во 81. минута кога повторно на сцена стапи Гонзалез, постигнувајќи го својот втор погодок на натпреварот и поставувајќи ги конечните 3:2. До крајот, фудбалерите на Реал Сосиедад не успеаја повторно да се вратат во игра, па трите бода останаа кај тимот предводен од тренерот Диего Симеоне.