Најголемиот досега забележан машки примерок на голема бела ајкула во Атлантскиот Океан повторно привлече внимание откако беше забележан во близина на американскиот брег. Огромната ајкула, наречена Контендер, тежи околу 770 килограми и била регистрирана како плива во близина на Кејп Фир, на околу 70 километри од брегот на сојузната држава Северна Каролина, според податоците од уредот за следење што го носи, пренесува „Дејли мејл“.

По неколкумесечен престој покрај брегот на Флорида, каде што научниците ја обележале на почетокот на 2025 година, ајкулата сега се движи кон север. Ова не е нејзино прво појавување во водите на Северна Каролина — таму поминала значителен дел од пролетта, уживајќи во потоплите мориња, пред есента да ја продолжи својата миграција кон Канада.

Движењата на Контендер се регистрирани на голема територија, од Веро Бич на југот на Флорида, па сè до Заливот Свети Лаврентиј во Канада. Се смета дека најголем дел од летото и зимата го минува во потоплите води на Флорида, додека во останатите сезони истражува нови делови од Атлантикот.

Областа околу Кејп Фир, во чија близина се наоѓа и островот познат по фосили од ајкули, важи за место каде често се забележуваат морски предатори, иако најчесто станува збор за помали видови. Во истиот регион неодамна биле регистрирани и други големи бели ајкули, меѓу кои и женката Нори, како и примерокот наречен Кајо.

Иако Контендер е најголемиот познат машки примерок од својот вид, сепак е значително помал од легендарната женка позната како „Големото Сино“, која достигнува должина од околу шест метри. Таа првпат беше забележана крај брегот на Мексико, а подоцна повторно снимена во близина на Хаваите додека се хранела со труп на кит.

И Контендер и Големото Сино се ретки исклучоци, бидејќи повеќето големи бели ајкули се значително помали. Името Контендер го добил по компанија што соработува со истражувачка организација која ги користи нивните пловила за научни мисии и следење на морскиот свет.