Нов протестен „Марш за ангелите“ се одржа денеска во Кочани, на кој родителите  упатија јавно прашање до надлежното обвинителство – до каде е обвинителниот акт во истрагата за евентуална одговорност на осомничени полицајци.

– Денеска се обраќаме до Основното јавно обвинителство за гонење организиран криминал и корупција. Согласно начелата на владеење на правото, законитоста и еднаквоста на сите граѓани пред законот, покажавме трпение и одговорност и во период од три плус три месеци не побаравме информации за текот и статусот на обвинителниот акт. Тоа го сторивме со цел да ѝ овозможиме на надлежната институција непречено, професионално и независно постапување. Меѓутоа, рокот што беше јавно и институционално најавен, со краен датум 12 декември 2025 година, е пробиен – изјави демонстрантка.

Службеникот од економија кој е обвинет за „Пулс“ и за поткуп излегува од притвор

Таа нагласи дека рокот е пробиен без достоинствено образложение, без официјално известување и без преземање видливи процесни дејствија од страна на надлежните органи.

Демонстрантите посочија дека дополнителна загриженост предизвикува и фактот што вработени во Министерството за внатрешни работи, кои се осомничени во предметот, и понатаму се наоѓаат на слобода и се движат меѓу граѓаните, без јавно достапни информации за изречени мерки на претпазливост, суспензија или друга форма на институционална одговорност.

Што правевте 13 години во Кочани ако имало јавашлак? – адвокатот Шилегов го прозва обвинителот, а родителите му порачаа: „Не си во парламент“

Родителите нагласија дека не бараат ништо надвор од законските рамки, туку навремена, законска и непристрасна постапка, како и јасен и конкретен одговор од надлежните институции.

– Непостапувањето или одолговлекувањето во вакви случаи, каде што осомничени се лица задолжени за спроведување на законот, создава сомнеж за селективност, што е спротивно на основните принципи на правната држава. Отсуството на навремена реакција и транспарентност директно ја нарушува правната сигурност, ја поткопува довербата во институциите и остава впечаток дека постои институционална толеранција кон евентуални незаконски дејствија извршени од службени лица. Не бараме ништо повеќе од она што го гарантира законот – навремена, законска и непристрасна постапка, како и јасен одговор за статусот на обвинителниот акт, причините за пробивањето на рокот утврден до 12 декември 2025 година и мерките што се преземени или ќе се преземат во однос на осомничените службеници на МВР. Нашето трпение не е неограничено. Во отсуство на итен и јасен одговор, ќе бидеме принудени да ги искористиме сите законски и јавни механизми за заштита на правдата и јавниот интерес. Молкот и одолговлекувањето веќе не се прифатливи. Бараме одговор – порача демонстрантката.