Повеќе од 130 предмети кои му припаѓаа на покојниот американски актер Метју Пери, познат по улогата на Чендлер Бинг во телевизиската серија „Пријатели“, ќе бидат понудени на аукција на 5 јуни во градот Далас, САД. Дел од приходите се наменети за Фондацијата „Метју Пери“ за помош на лица кои се борат со болести на зависност, пишува „Ен-Зи Хералд“.

Како што пренесува „БФМ ТВ“ (BFM TV), на аукцијата во јуни во Соединетите Американски Држави ќе бидат понудени уметнички дела од Бенкси, сценарија од култната серија „Пријатели“, како и околу 130 предмети, меѓу кои и неговиот омилен рачен часовник и спомени од детството.

Претставничката на аукциската куќа „Херитеџ Окшнс“ (Heritage Auctions), Роберта Крамер, изјави дека продажбата опфаќа „различни предмети од животот на актерот“.

„Тука се работите поврзани со работата на Пери во серијата ’Пријатели‘ и други телевизиски и филмски проекти, но и бројни многу лични предмети, од неговото детство па сè до зрелите години“, изјави Крамер.

Целта на аукцијата е прибирање средства за Фондацијата „Метју Пери“, организација која им помага на лицата кои се борат со зависности. Како што наведе Крамер, актерот ја основал фондацијата со цел да ја искористи својата „слава и личното искуство со зависноста за да им помогне на другите“.

Актерот, кој го толкуваше ликот на Чендлер Бинг во ситкомот на американската телевизија Ен-Би-Си (NBC), беше пронајден мртов во 2023 година на 54-годишна возраст, откако претходно јавно зборуваше за своите проблеми со зависноста.

Според резултатите од истрагата, Пери примал кетамин под лекарски надзор во рамките на терапијата против депресија, но овој анестетик, кој често се злоупотребува поради неговото стимулативно и еуфорично дејство, почнал повторно да го користи на своја рака во текот на есента 2023 година.

За смртта на актерот беа осудени повеќе лица, меѓу кои и Џасвин Санга, позната под прекарот „кралицата на кетаминот“, која го снабдувала Пери.